ქედის საკრებულომ დღეს ,,სოფლის მხარდაჭერის პროგრამის ფარგლებში“ განსახორციელებელი სამუშაოების ჩამონათვალი დაამტკიცა.
პროგრამის განსახორციელებლად მიმდინარე წელს ქედაში 596 828 ლარი დაიხარჯება და 60 სოფელში სულ 80 ღონისძიება გატარდება. პროგრამულად ყველაზე მეტი თანხა 100 564 ლარი მახუნცეთის თემს მოხმარდება და აქ 14 ღონისძება გატარდება.
„გასულ წელთან შედარებით „სოფლის მხარდაჭერის პროგრამის“ ფრგლებში გამოყოფილი თანხა 30 000 ლარით გაზრდილია. როგორც კი მოეწერება ხელი აღნიშნულ დადგენილებას ჩვენ დავიწყებთ სამუშაოებს. სავარაუდოდ სამუშაოები პირველი ოქტომბრისთვის დასრულდება“ – ამბობს ქედის გამგეობის ეკონომიკური განვითარების სამსახურის უფროსი, სულიკო ბოლქვაძე.
აღნიშნული საკითხის გარდა დღეს გამართულ სხდომაზე ქედაში დეპუტატება კენჭი უყარეს საპრივატიზაციო ნუსხას. მმართველმა გუნდმა გამგეობის მიერ წარმოდგენილ საპრივატიზაციო ნუსხას მხარი სრულად არ დაუჭირა. პრივატიზების ნუსხაში შეტანილი ცხრა ავტომობილიდან უმრავლესობამ მხარი სიაში მხოლოდ 8 ავტომობილის დატოვებას დაუჭირა. აღნიშნულ საკითხთან დაკავშირებით შენიშვნები ჰქონდათ ოპოზიციის დეპუტატებს, „ერთიანი ნაციონალური მოძრაობის“ წევრი ვაჟა ბოლქვაძე ამბობს, რომ ავტომობილისთვის, რომელიც ქედის გმგეობაში არსებულმა შიდა აუდიტმა გამოუყენებლად მიიჩნია, საწვავი დღემდე გამოიყოფა.
ოპოზიციის შენიშვნა უსაფუძვლოდ მიაჩნია ქედის საკრებულოს თავმჯდომარეს ამირან ცინცაძეს. ის განმარტავს, რომ პრივატიზების ნუსხაში გარკვეული ტიპის ხარვეზი იყო, რის გამოც საკითხს მხარი არ დაუჭირა, თუმცა რა ხარვეზი აღმოაჩინა სხდომის მსვლელობისას დეპუტატებმა პრივატიზების ნუსხაში, თავმჯდომარე არ აკონკრეტებს. დღეს გამართულ სხდომას ქედაში საკრეულოს 24 წევრიდან 6 დეპუტატი არ ესწრებოდა.
ქედის საკრებულოს სხდომა / 15.04.2016 /
