20 წლის კაცის მდგომარეობა, რომელსაც გუშინ, 12 ივნისს, ბათუმში „DS გრუპის“ სამშენებლო ობიექტიდან ჩამოვარდნილი საგანი დაეცა, ისევ მძიმეა.
დაშავებული ბათუმში საუნივერსიტეტო კლინიკაში იმყოფება, სადაც მას რამდენიმე ოპერაცია ჩაუტარდა თავის არეში.
როგორც კლინიკაში „ბათუმელებს“ უთხრეს, პაციენტი რეანიმაციულ განყოფილებაში, მართვით სუნთქვაზე იმყოფება და „მის მდგომარეობას ექიმები აფასებენ, როგორც მძიმეს“.
მშენებარე კორპუსი კობალაძის 16 ნომერში მდებარეობს. მოქალაქეს მშენებლობიდან ჩამოვარდნილი ხის ძელი დაეცა.
შს სამინისტროს ინფორმაციით, გამოძიება სისხლის სამართლის კოდექსის 240-ე მუხლით მიმდინარეობს, რაც გულისხმობს სამთო, სამშენებლო ან სხვა სამუშაოს წარმოებისას უსაფრთხოების წესის დარღვევას, რამაც გამოიწვია ჯანმრთელობის ნაკლებად მძიმე ან მძიმე დაზიანება.
დანაშაული ისჯება ჯარიმით ან გამასწორებელი სამუშაოთი ვადით ორ წლამდე ანდა თავისუფლების აღკვეთით ვადით ორ წლამდე, თანამდებობის დაკავების ან საქმიანობის უფლების ჩამორთმევით ვადით სამ წლამდე ან უამისოდ.
______________________________
ამ თემაზე:
მძიმეა 20 წლის კაცის მდგომარეობა, რომელსაც თავში მშენებლობიდან ჩამოვარდნილი ძელი მოხვდა
