უკრაინის ქალაქი ხერსონი რუსმა ოკუპანტებმა 2 მარტს აიღეს. მიუხედავად ამისა, ხერსონში თავისუფალი უკრაინის მხარდასაჭერად და ოკუპაციის გასაპროტესტებლად არ წყდება ქუჩის აქციები. „ბათუმელების” რესპონდენტი ოკუპირებული ხერსონიდან, რომელსაც უსაფრთხოების მიზნით საკუთარი ვინაობის გამხელა არ სურს, გვეუბნება, რომ საპროტესტო აქციებზე ათობით ათასი უკრაინელი გამოდის ყოველდღე.
იგორ რუბინენკო (გვარი შეცვლილია) გვიამბობს, რა ხდება ახლა ხერსონში და როგორია ოკუპირებული ქალაქის მცხოვრებთა ყოველდღიურობა.
იგორ რუბინენკო, ხერსონის მცხოვრები:
პირველი დღეებიდანვე მასიურად დაიწყეს რუსმა ოკუპანტებმა მაროდიორობა ბანკებში, მაღაზიებში, ყველგან.
მადლობა ღმერთს, ქალაქის მერმა ინფრასტრუქტურის ნაწილი აამუშავა, ათობით ათასი ხერსონელი იკრიბება ყოველდღე საპროტესტო აქციებზე, ყველას ერთი მოთხოვნა აქვს: გათავისუფლდეს ხერსონი და მთელი უკრაინა ოკუპანტებისგან.
ძალიან ცოტაა საკვები, მაღაზიებში თითქმის აღარაფერი დარჩა, საერთოდ აღარ მოიპოვება ხორცი, მაკარონი და მარცვლეული. წამლებიც აღარსადაა, ჩვეულებრივი, პირველადი წამლებიც კი აღარ გვაქვს ქალაქში, არაფერს ვამბობ სპეციალური დანიშნულების მედიკამენტებზე.
ჰუმანიტარული დანიშნულების მანქანებს, რომელსაც საკვები და მედიკამენტები მოაქვთ, ხერსონში არ უშვებენ.
ქალაქში მკაცრი „წმენდა” დაიწყეს ოკუპანტებმა. ქუჩაში აჩერებენ უკრაინელებს, ართმევენ ტელეფონებს და უმოწმებენ სოციალურ ქსელებს, ფოტოგალერეას, ყველაფერს. კაცებს აშიშვლებენ და ამოწმებენ იარაღს ხომ არ მალავენ სადმე, უკმაყოფილო ან „საეჭვო” უკრაინელებს იჭერენ და გაურკვეველი მიმართულებით მიჰყავთ.
ყველგან ცდილობენ დაიჭირონ და დააშინონ უკმაყოფილო უკრაინელები სხვადასხვა მეთოდით, ზოგი ხანგრძლივ დაკითხვებზე მიჰყავთ. კარგა ხანია გათიშეს უკრაინული არხები და მხოლოდ პროპაგანდისტულ რუსულ არხებს აჩვენებენ, სადაც ვხედავთ, რომ თითქოს ხერსონში ყვავილებით ხვდებიან რუს ოკუპანტებს, თითქოს ჰუმანიტარული დახმარების პროდუქტებს ურიგებენ ხერსონელებს, ამ დროს კი ეს კადრები ჩვენი მაღაზიებიდან მოპარული პროდუქტებით გადაიღეს.
ჩერნობაევკასთან (ხერსონის ოლქში) უკვე მეორე დღეა უკრაინის შეიარაღებული ძალები ებრძვიან ოკუპანტებს.
ხერსონი არ ნებდება, მიუხედავად რთული მდგომარეობისა, ხალხი ერთიანია და ყველა თავისუფალი უკრაინის მხარდასაჭერად გამოდის ქუჩაში.
რუსი ოკუპანტების საკვებით მომარაგება ახლა ყირიმიდან დაიწყეს.
ხერსონის მოსახლეობის მომარაგებას მოხალისეებიც ცდილობენ ჯერჯერობით, როცა საკვების რაოდენობა ამოიწურება, მერე რა იქნება არ ვიცით.
ძალიან სამწუხარო რამაა ომი, მაგრამ ჩვენი ხალხი ამ ომმა გააერთიანა. პირველად მოხუცებს ვკვებავთ, წამლებს ვაძლევთ – მიუხედავად იმისა, რომ აღარსად არაფერი მოიპოვება, რაც გვაქვს ერთმანეთს ხელიდან ხელში გადავცემთ. ყველა ერთმანეთს ვეხმარებით, შეძლებისდაგვარად“.
___
მთავარი ფოტო: ხერსონი 2 მარტის დაბომბვის შემდეგ
