„უმეტეს შემთხვევაში, 60-დან 80 პროცენტამდე არის შემცირებული ფასები მედიკამენტებზე, როგორც მინიმუმ განახევრებულია ფასები“ – განაცხადა დღეს, 7 მარტს, მთავრობის სხდომაზე პრემიერ-მინისტრმა ირაკლი ღარიბაშვილმა.
„ყველაზე მოთხოვნადი წამლები რაც არის, მაგალითად, გულსისხლძარღვთა დაავადების სამკურნალო მედიკამენტის ფასი თუ იყო მანამდე 220 ლარი, დღეს მისი ღირებულება არის 48 ლარი,“ – აღნიშნა პრემიერმა.
მას არ დაუსახელებია კონკრეტულად რომელ მედიკამენტს გულისხმობდა, თუმცა ასევე თქვა, რომ შეუძლია მოიყვანოს წამლის გაიაფების „რამდენიმე მაგალითი“.
ირაკლი ღარიბაშვილის განცხადებით, თურქეთის ბაზრის გახსნის შედეგია წამლების გაიაფება საქართველოში.
„ჩვენ გავხსენით თურქეთის ბაზარი იმ დათქმით, რომ მხოლოდ მაღალი სტანდარტის წამლები შემოვიდოდა. მინდა ახლა ჩვენს მოსახლეობას ვუთხრა, რომ წამლები უკვე შემოსულია საქართველოში, ხელმისაწვდომია და აფთიაქებში იყიდება,“ – დასძინა ღარიბაშვილმა.
გასულ წელს პრემიერმა საჯაროდ 4-ჯერ ისაუბრა წამლების სიძვირეზე.
