Batumelebi | ღარიბაშვილი წამლების სიძვირეზე წელს უკვე მეოთხედ საუბრობს ღარიბაშვილი წამლების სიძვირეზე წელს უკვე მეოთხედ საუბრობს – Batumelebi
ნეტგაზეთი • RU

ღარიბაშვილი წამლების სიძვირეზე წელს უკვე მეოთხედ საუბრობს

„მედიკამენტების ფასები არის ძალიან გაზრდილი და ჩვენ ვალდებული ვართ, ამაზე მოვახდინოთ დროული რეაგირება,“ – განაცხადა საქართველოს პრემიერ-მინისტრმა ირაკლი ღარიბაშვილმა ეკონომიკური საბჭოს სხდომაზე, მთავრობის ადმინისტრაციაში.

როგორც მთავრობის პრესრელიზშია აღნიშნული, ფარმაცევტული ბაზრის მონიტორინგის შუალედური ანგარიში ღარიბაშვილის რამდენიმე დღის წინ კონკურენციის სააგენტოს თავმჯდომარემ, ირაკლი ლექვინაძემ გააცნო და დღეს, 12 ნოემბერს, ეს საკითხი ეკონომიკურ საბჭოზე განიხილეს.

„უკვე წლებია ასე განვითარდა ეს პროცესი და საჭიროებს სწორად ჩარევას ჩვენი მხრიდან. რეალურად, ჩვენ უნდა გავაკეთოთ ისე, როგორც არის ევროპის ქვეყნებში. ახალს არაფერს არ ვიგონებთ, ეს საკითხი უნდა დარეგულირდეს, იმიტომ, რომ ჩვენს მოსახლეობას ძალიან აწუხებს. მინდა, ამ ფორმატში ვიმსჯელოთ და დავიწყოთ რეაგირება და ქმედება”,- განაცხადა პრემიერ-მინისტრმა.

2021 წელს ღარიბაშვილი მეოთხედ ამბობს, რომ წამალი საქართველოში ძვირია: წამლების ფასზე ღარიბაშვილმა ისაუბრა 2021 წლის აგვისტოში, ივნისსა და თებერვალში, თუმცა ამ საკითხის გადასაწყვეტად არც ერთი ნაბიჯი არ გადადგმულა. პრემიერის განცხადებიდან განცხადებამდე წამლების ფასი ისევ იზრდება.

ჯანმრთელობის მსოფლიო ორგანიზაციის ანალიზის თანახმად, ევროპის სხვა ქვეყნებთან შედარებით, საქართველოში მაღალია გაღარიბების და ჯანდაცვაზე გაწეული კატასტროფული დანახარჯების შემთხვევები.

საქართველოში მედიკამენტების მაღალი ფასის გამო წლებია აჭარიდან არაერთი მოქალაქე თურქეთში გადადიოდა, რომ იაფად შეეძინა საჭირო წამლები. ეს პროცესი პანდემიამ შეაფერხა.

„ბათუმელები“ ჯერ კიდევ წინა წლებში წერდა ქართულ და თურქულ სააფთიაქო ქსელებში არსებულ ფასთა სხვაობაზე.

ნეტგაზეთის მასალების სხვა გამოცემებში გადაბეჭდვის წესი
ავტორი
ნანა კვაჭაძე, ჟურნალისტი ელფოსტა: kvachadze.n@gmail.com