ბათუმის ბულვარში მეტალის ახალი ინსტალაცია განთავსდა. რკინის „ტყის კაცი“ ნახევრად წაქცეულ ნაძვის ხეს ხელებით იჭერს.
ინსტალაციის ავტორი ბექა ჯანუაშვილია.
ბულვარის ადმინისტრაციის თქმით, არტინსტალაცია, რომელიც წაქცეულ ხეს აკავებს, სიმბოლურად ბუნებისადმი მოფრთხილებას ასახავს.
„ინსტალაცია გარემოს დაცვის კუთხით ცნობიერების ამაღლებას ემსახურება. ეს ბათუმის ბულვარისთვის ერთ-ერთი პრიორიტეტული მიმართულებაა. პროექტი ბექამ ერთ-ერთი ფესტივალის ფარგლებში გააკეთა და შემდეგ შემოგვთავაზა მისი განთავსება ამ ადგილას.
ეს არის დროებითი ინსტალაცია, გარემოს დაცვის მიმართულებით ჩვენ ვაკეთებთ ხოლმე მსგავს პროექტებს ბულვარის სხვადასხვა ადგილას. ქალაქის ყველაზე გამწვანებული საპარკე სივრცე ღიაა ამ კუთხით სხვადასხვა იდეის ხელშეწყობისა და მხარდაჭერისთვის“ – ამბობენ ბულვარის ადმინისტრაციაში.
„ტყის კაცი“ – ინსტალაცია ბათუმის ბულვარში
