ბათუმის საქალაქო სასამართლომ ქობულეთში მდებარე სასტუმრო „არმაზის“ მფლობელის, ზაზა ართმელაძის საქმის განხილვა დაიწყო. 2015 წლის 10 მაისს სასტუმრო „არმაზში“ გაჩენილმა ხანძარმა გასტროლზე მყოფი რუსთავის ქორეოგრაფიული ანსამბლის -„სიხარული 2“-ის 3 მოზარდის სიცოცხლე იმსხვერპლა. ართმელაძეს პროკურატურა უსაფრთხოების წესების დარღვევას ედავება, რამაც პირთა სიცოცხლის მოსპობა გამოიწვია. ზაზა ართმელაძე წინასწარ პატიმრობაში იმყოფება.
წინასასამართლო სხდომაზე ზაზა ართმელაძის ადვოკატმა მტკიცებულებების ნაწილის დაუშვებლად ცნობა მოითხოვა. „მოწმეთა ჩვენებები კანონის უხეში დარღვევებითაა მოპოვებული, რადგან დაკითხვების ძალიან დიდი ნაწილი ჩატარებულია ღამის საათებში. თუ ეს იყო გადაუდებელი აუცილებლობით გამოწვეული, რასაც კანონი ითვალისწინებს, მაშინ ეს აუცილებლად უნდა იყოს მითითებული, მაგრამ პროკურატურამ დღეს აღნიშნა, რომ საქმის რეზონანსულობის გამო მოუხდათ დაკითხვის წარმოება ღამის საათებში“, – უთხრა „ბათუმელებს“ დაცვის მხარის ადვოკატმა ტარიელ კაკაბაძემ.
მოსამართლე დავით მამისეიშვილი დაცვის მხარის შუამდგომლობაზე გადაწყვეტილებას რამდენიმე დღეში მიიღებს, ვიდრე საქმის არსებითი განხილვა დაიწყება.
ზაზა ართმელაძის საქმის განხილვას დღეს ნათესავების გარდა საზოგადოების წევრებიც ესწრებოდნენ.
