შპს „სუპერ გრუპის“ წინააღმდეგ ბათუმის მუნიციპალურმა ინსპექციამ განმეორებითი საქმის წარმოება დაიწყო გასულ შაბათს, 30 იანვარს. სწორედ ამ დღეს სამშენებლო ობიექტიდან 35 წლამდე მუშა ჩამოვარდა და დაიღუპა.
ინსპექციის პრესსამსახურის ინფორმაციით, „სამართალდამრღვევს კანონის შესაბამისად მიეცა მითითება“. კომპანია იმავე მიზეზით – „უსაფრთხოების ნორმების დარღვევის გამო“ – გასულ წელს ორჯერ გააფრთხილეს, შესაბამისი საქმის წარმოება კი ორივე შემთხვევაში ხარვეზის გამოსწორების შემდეგ შეწყდა.
მუნიციპალურ ინსპექციაში არ გვიპასუხეს კითხვაზე, კონკრეტულად რა დარღვევა დააფიქსირა მუნიციპალური ინსპექციის ჯგუფმა 30 იანვარს, მას შემდეგ, რაც მუშა შენობიდან ჩამოვარდა და დაიღუპა. გვაინტერესებდა ხომ არ უკავშირდებოდა დარღვევა ე.წ. უსაფრთხოების ბადეს ან მასთან დაკავშირებულ ხარვეზს. სამსახურში არც ამ კითხვაზე გვიპასუხეს.
არაოფიციალური ინფორმაციით, სამშენებლო ობიექტს უსაფრთხოების ბადე შემოვლებული ჰქონდა, თუმცა უბედური შემთხვევის დროს ერთ მხარეს ეს ბადე მოხსნილი იყო, სამშენებლო მასალების ასატანად. მუშაც სწორედ ამ მხრიდან გადავარდა.
კომპანიაში გვითხრეს, რომ ჩვენს კითხვებს ვერ უპასუხებენ: „მფლობელს უნდა დაურეკოთ, ვერაფერს გეტყვით“.
კომპანიის მფლობელთან დაკავშირება ვერ მოვახერხეთ.
შინაგან საქმეთა სამინისტროს ინფორმაციით, ფაქტზე დაწყებულია გამოძიება სისხლის სამართლის კოდექსის 240 -ე მუხლით, რაც გულისხმობს უსაფრთხოების წესის დარღვევას სამთო, სამშენებლო ან სხვა სამუშაოს წარმოებისას, რამაც გამოიწვია ადამიანის სიცოცხლის მოსპობა.
