ქობულეთის მუნიციპალიტეტის გამგებლის სულხან ევგენიძის ინფორმაციით, რუსთაველის ქუჩაზე დარგული 20-ზე მეტი იაპონური მუხის ნერგები შუაზე გადატეხეს. როგორც გამგებელი ამბობს, ნერგები ტენდერით იყო შეძენილი და დაახლოებით ათი ათასი ლარი დაჯდა. გამგებელი ამბობს, რომ გამოძიება დაწყებულია, თუმცა ეჭვმიტანილების ვინაობა არ არის ცნობილი.
„ნეტა დამაჭერინა ვინც ეგ გააკეთა. „ვისოლის“ ბენზინგასამართ სადგურზეა ერთი ვიდეოთვალი, მაგრამ ჯერ-ჯერობით ვერ მოხდა დამნაშავეების დადგენა. კიდევ ერთი ვიდეოთვალის ჩანაწერები უნდა შემოწმდეს და იმედია, იპოვის პოლიცია დამნაშავეებს“ – აცხადებს სულხან ევგენიძე.
გამგებლის თქმით, ჯერ უცნობია, მოხერხდება თუ არა ნერგების გადარჩენა.
„გამწვანების სამსახური დაათვალიერებს ნერგებს და ვნახოთ რა გადაწყვეტილებას მიიღებს“ – ამბობს გამგებელი.
შუაზე გადატეხილი მუხის ნერგი რუსთაველის ქუჩაზე. ფოტო: qobuleti.com
