„გაიხსნას საზღვრები“, „აღდგეს ფრენები“ – ამ მოთხოვნებით ბათუმში, ევროპის მოედანზე, საპროტესტო აქცია გაიმართა. აქციის მონაწილეები მიიჩნევენ, რომ შეზღუდვები საჭირო არ არის.
„ჩვენი მოთხოვნაა გაიხსნას საზღვრები, აღდგეს ფრენები და შეწყდეს კარანტინი, რომელიც კორუფციის ბუდედ იქცა. ეს ასობით, ათასობით მოქალაქეზე აისახება. ჩვენ ვართ დასახელებული, როგორც უსაფრთხო ქვეყანა და არ ვხსნით საზღვრებს, ევროპის ჩრდილოეთ კორეად ვიქეცით… ჯერ კიდევ არ ვიცით, როგორ აისახება ეს ჩვენს ეკონომიკაზე… ხელისუფლებამ მოირგო მზრუნველის როლი და პოლიტიკურ ქულებს იწერს, ევროპის ქვეყნებში კი, უკვე ისწავლეს კორონავირუსთან ერთად ცხოვრება წესების დაცვით, ასე უნდა მოვიქცეთ ჩვენც,“ – გვითხრა ირაკლი კუკანიამ. ის სამოქალაქო აქტივისტია და ამ აქციის ერთ-ერთი ორგანიზატორი.
აქციაზე ძირითადად ბათუმში არსებული კაზინოების თანამშრომლები გამოვიდნენ. მათ საბანკო ამონაწერები გვაჩვენეს, რომლის მიხედვითაც ბანკებში უკვე დავალიანება აქვთ. კაზინოების თანამშრომლების თქმით, მათი საშუალო ანაზღაურება თვეში 300-დან 900 დოლარამდეა, საბანკო სესხიც დიდი ოდენობით აქვთ აღებული და ახლა სხვა სამსახურის დაწყება არ აწყობთ.
„ჯერ ერთი, ასე მარტივად ვერც ნახავ სამსახურს, 500-ლარიანი სამსახური რომც ვნახო, ბანკი მაშინვე ჩამომაჭრის, რადგან დავალიანება მაქვს, ახლა მერიცხება მხოლოდ 200 ლარი ბიუჯეტიდან და ამით ვირჩენ თავს. ასეა ასობით ადამიანი, რომელიც კაზინოში მუშაობს… ჩვენ არ ვიცით, როდის დავიწყებთ მუშაობას, თუმცა არც აქვს აზრი გახსნას, თუკი საზღვარი არ გაიხსნება,“ – გვითხრა ხათუნა გურგენიძემ.
