საქართველოს პრემიერ-მინისტრმა გიორგი გახარიამ თქვა, რომ გაღარიბდა. გახარიას კითხვა 2015 წლის შემდეგ მისი ქონებრივი დეკლარაციიდან გამქრალ შემოსავალზე დღეს, 5 ივნისს, ქუთაისში გამართული შეხვედრის შემდეგ დაუსვეს.
„2015 წლის შემდეგ გავღარიბდი და ამისთვის ყოველთვის მზად ვიყავი, იმიტომ, რომ ვემსახურები ამ ქვეყანას,“ – თქვა გიორგი გახარიამ.
მისი თქმით, ქონებრივი დეკლარაცია უკიდურესად მნიშვნელოვანი დოკუმენტია, რომელიც მის მიერ დეტალურადაა შევსებული.
„იქ არის ყველაფერი დაცული. რაღაცა გავყიდე, რაღაცა ნაწილში მეც ვღარიბდები და ყველა ჩინოვნიკი უნდა მიეჩვიოს იმას, რომ სახელმწიფო სამსახურში რომ მოდის, უბრალოდ შემოსავალი აკლდება. ეხლა რა გინდათ, მოგიყვეთ, ჩემს წინა ცხოვრებაში შემოსავლები რამდენი მქონდა?“ – თქვა გიორგი გახარიამ.
გიორგი გახარიამ ქონებრივი დეკლარაცია 30 მაისს შეავსო. დეკლარაციის შევსების მომენტში საქართველოს პრემიერ-მინისტრს სახელფასო ანგარიშზე 99 ლარი და 41 თეთრი ჰქონდა.
