საქართველოში საგანგებო მდგომარეობა 21 მარტს გამოცხადდა, კომენდანტის საათი კი – 31 მარტს. პრემიერ-მინისტრს არ დაუკონკრეტებია საგანგებო მდგომარეობისა და კომენდანტის საათის მოქმედების შეწყვეტის ვადა, თუმცა ცნობილია, რომ საგანგებო მდგომარეობა და კომენდანტის საათი გრძელდება 22 მაისის ჩათვლით.
საქართველოში საგანგებო მდგომარეობა და კომენდანტის საათი უქმდება – ამის შესახებ დღეს, 21 მაისს, საქართველოს პრემიერ-მინისტრმა, გიორგი გახარიამ განაცხადა. თუმცა, მისივე თქმით, გარკვეული შეზღუდვები, რაც აუცილებელია ჯანდაცვის სფეროსთვის, იქნება შენარჩუნებული.
„ვირუსი არსად არ წასულა და ყველას უნდა გვესმოდეს, რომ ეს ბრძოლა ჩვენთან ერთად იქნება, ის პერიოდი, რომელზეც დღეს დაზუსტებით ვერავინ ვერ ამბობს. საგანგებო მდგომარეობის გაუქმების შემდგომ ჩვენი პასუხისგებლობა, როგორც მთავრობის, ისე თითოეული მოქალაქის, კიდევ უფრო იზრდება და მოთხოვნა სოციალური დისტანციის, პირბადის და სხვა მოთხოვნები, რომელსაც ჯანდაცვის სპეციალისტები გვიყენებენ, არის კიდევ უფრო მნიშვნელოვანი,“ – განაცხადა გიორგი გახარიამ.
მან განაცხადა, რომ მთავრობას სჭირდება საკანონმდებლო ჩარჩო საგანგებო მდგომარეობის გარეშე გარკვეული შეზღუდვების შესანარჩუნებლად და ამისათვის მთავრობამ მიმართა საქართველოს პარლამენტს.
