იმისთვის, რომ საქართველოს ხუთი მოქალაქე ბოსნია და ჰერცეგოვინადან საქართველოში დაბრუნებულიყო, მათ ხუთი ქვეყნის საზღვრის გადაკვეთა მოუწიათ. ინფორმაციას ამის შესახებ საქართველოს საგარეო საქმეთა სამინისტრო ავრცელებს.
საქართველოს 5 მოქალაქე ქალაქ გრუდეში იმყოფებოდა, საიდანაც ბოსნია და ჰერცეგოვინას მიერ დაწესებული მკაცრი საკარანტინო შეზღუდვების გამო ვერ ახერხებდნენ გადაადგილებას.
საგარეო საქმეთა სამინისტროს მიერ გავრცელებული ინფორმაციის თანახმად, მოქალაქეების ქვეყნიდან გამოყვანა ანკარაში საქართველოს საელჩოს დახმარებით გახდა შესაძლებელი.
ანკარაში საქართველოს საელჩომ, რომელიც ასევე აკრედიტებულია ბოსნია და ჰერცეგოვინაში, უზრუნველყო საქართველოს მოქალაქეებისთვის ბოსნიის ტერიტორიაზე გადაადგილებისთვის საჭირო სპეციალური ნებართვის მოპოვება.
ამ ნებართვის მოპოვების შემდეგ მოქალაქეები ქალაქ გრუდედან სერბეთის საზღვრამდე მივიდნენ. სერბეთიდან საქართველოს დიპლომატიურმა წარმომადგენლობამ უზრუნველყო მოქალაქეების ტრანსპორტირება და შესაბამისი ნებართვების მოპოვება უნგრეთის საზღვრამდე გადაადგილებისთვის.
შემდეგ უნგრეთში საქართველოს საელჩომ მოქალაქეები გადაიყვანა ავსტრიაში, ქალაქ ვენაში. 1-ელ მაისს ხუთივე მოქალაქე ვენიდან ავიარეისით გაფრინდა ბელორუსში, მინსკში. მინსკიდან კი ერევანში. ერევნიდან ისინი სომხეთში საქართველოს საელჩოს მიერ ორგანიზებული დერეფნის საშუალებით დააბრუნეს სამშობლოში.
