ქვიშხეთთან ავტოავარიის შედეგად სამი მცირეწლოვანი ბავშვი მამასთან ერთად დაიღუპა. ბავშვების დედა მარიანა ქორიძე კი უმძიმესი ტრავმებით კლინიკაში გადაიყვანეს. შემთხვევა 26 იანვარს მოხდა. ინფორმაცია დედის გარდაცვალების შესახებაც გავრცელდა, თუმცა ის, როგორც მკურნალი ექიმი ამბობს, დღემდე კომატოზურ მდგომარეობაშია. მარიანას ექიმის თქმით, შესაძლოა ის სიცოცხლის ბოლომდე ამ მდგომარეობაში დარჩეს. ოჯახს ფინანსური მხარდაჭერა სჭირდება.
მარიანას მდგომარეობაზე მისმა ახლო მეგობარმა, ამირა კოპალიანმა მოგვწერა. მისი თქმით, სახელმწიფო დაზღვევა ერთ თვეზე მეტია ამოიწურა, მარიანა კი ჯერ კიდევ მართვით სუნთქვაზეა.
„კლინიკაში დღიური გადასახადი 600 ლარია. ამას ემატება 56-60 ლარი კვების. რადგან მარიანა კომატოზურ მდგომარეობაშია, საკვებს ზონდით იღებს. ოჯახს კლინიკის ვალი დაუგროვდა. ამ ეტაპზე ამ ვალის დაფარვაში ანიტას ფონდი დაგვეხმარა 12 000 ლარით. თანხა ანიტას დედამ გუშინ ჩარიცხა, თუმცა ახალი ათვლა დაიწყო და ფინანსური დახმარება ისევ გვჭირდება“, – გვითხრა ამირა კოპალიანმა.
მისი თქმით, სოციალურ ქსელში მარიანას დასახმარებლად კამპანია წამოიწყო, მაგრამ გაჩნდა უნდობლობაც. „თავდაპირველად ცალკეულმა სააგენტოებმა არასწორად გაავრცელეს ინფორმაცია, თქვეს, რომ მარიანაც დაიღუპა. ეს ინფორმაცია ახსოვს ბევრს და გვეუბნებოდნენ, ხომ გარდაიცვალა დედაცო. ამიტომაც გვინდა სწორი ინფორმაციის გავრცელება, იქნებ გამოუჩნდეს მარიანას დახმარების მსურველები“, – გვეუბნება ამირა კოპალიანი.
მარიანა ქორიძე ამჟამად თბილისში კლინიკა „ჯერარსის“ რეანიმაციაშია. მკურნალი ექიმი დავით ყაზაიშვილი „ბათუმელებთან“ ამბობს, რომ პაციენტის მდგომარეობა ძალიან მძიმეა. მას ვეგეტატიური მდგომარეობა აქვს (როდესაც პაციენტს არ შეუძლია გარე გაღიზიანებაზე რაიმე ხილული ფორმით პასუხის გაცემა).
„სასიცოცხლო ფუნქციები მეტ-ნაკლებად შევინარჩუნეთ, მაგრამ ნევროლოგიური მდგომარეობა არის მძიმე. პარალიზებული დარჩება და მუდმივად მოსავლელი იქნება“, – გვეუბნება ექიმი.
მისი თქმით, კიდევ რამდენს ხანს დარჩება პაციენტი კლინიკაში, ამის წინასწარ განსაზღვრა რთულია. „ერთ კვირაში შესაძლოა მზად იყოს გასაწერად, თუ რაიმე გართულება არ გაჩნდა, ოღონდ გაწერის შემთხვევაშიც, მას დასჭირდება მუდმივი საექთნო მეთვალყურეობა. შესაძლოა რაიმე შეიცვალოს მის მდგომარეობაში, თუმცა მაღალი შანსია, რომ ასე დარჩეს. პაციენტს 4-ჯერ გაუჩერდა გული, აქვს თავის სერიოზული ტრავმა“.
ამირა კოპალიანის თქმით, მარიანას ხანდაზმული, პენსიონერი მშობლები ჰყავს და ამ მდგომარეობაში შვილის მოვლას ვერ შეძლებენ. „ერთი ბინა აქვთ, თუმცა ვერც მას გაყიდიან, რადგან მარიანას სახელზეა. გარდა ამისა, კლინიკიდან გამოყვანის შემდეგ, მარიანას სპეციალური საწოლი დასჭირდება, თუ დამოუკიდებლად სუნთქვა ვერ შეძლო, მაშინ სასუნთქი აპარატი შესაძენი იქნება. ექთნის დაქირავებაც გახდება საჭირო, რადგან მარიანა ცხვირ-ხახის ზონდით იკვებება და მშობლები ამის გაკეთებას ვერ შეძლებენ. ამიტომ საზოგადოების მხარდაჭერა დაგვჭირდება ფინანსურად, რომ ექთანი ავიყვანოთ“.
„ბათუმელები“ მარიანას მშობლებსაც ესაუბრა. ისინი ამბობენ, რომ ბინის გაყიდვას ვერ შეძლებენ, რადგან ბანკის იპოთეკით არის დატვირთული. „სოფელში გვაქვს მამაპაპისეული სახლი და თუ ის გავყიდეთ, იქნებ რამეში წაგვეხმაროს“, – ამბობენ მშობლები.
მთავარი ფოტო: მარიანა ქორიძე შვილებთან ერთად/ფეისბუქი
