სასმელი წყალი, დაბალი ხელფასი, ძვირი წამლები – რა პრობლემები აქვთ ოჯახებს საქართველოში

IRI-ის ახალი კვლევის თანახმად, საქართველოში ოჯახების მთავარი პრობლემა უმუშევრობა, სასმელი წყალი, დაბალი ხელფასი და მედიკამენტებზე მაღალი ფასებია.

რა არის მთავარი პრობლემა, რომლის წინაშეც დღეს ოჯახი დგას, ასე იყო დასმული კითხვა, რომელზეც გამოკითხულთა 31-მა პროცენტმა უმუშევრობა მონიშნა.

ოჯახების პრობლემად დაბალ ხელფასს მიიჩნევს გამოკითხულთა 14%. ამდენივე ასახელებს სიღარიბეს, ხოლო 9% – მედიკამენტების სიძვირეს. გამოკითხულთა 7 % მიიჩნევს, რომ პრობლემა ყველაფერზე მაღალი ფასებია, 4 % პრობლემად ასახელებს საბანკო კრედიტებს, 5 % – ჯანმრთელობის დაზღვევას, 6 % კი დაბალ პენსიას.

რა არის მთავარი პრობლემა თქვენს ქალაქში/სოფელში? ასე იყო დასმული მეორე კითხვა, რასაც გამოკითხულთა 44 %-მა უპასუხა, რომ – უმუშევრობა. გამოკითხულთა 13 %  მიიჩნევს, რომ მთავარი პრობლემა სასმელი წყალია, 11 %-მა დაასახელა გზა, 12 %-მა სიღარიბე.

გამოკითხულთა 6 %, თავიანთი ქალაქის თუ სოფლის პრობლემად, გარემოსდაცვით საკითხებს მიიჩნევს, 5 % – ინფრასტრუქტურას.

IRI-ის კვლევა, რომელიც 8 ნოემბერს გამოქვეყნდა, 11 სექტემბრიდან 14 ოქტომბრის პერიოდში IRI-ის დაკვეთით და USAID-ის დაფინანსებით ჩაატარა Baltic Surveys/The Gallup Organization-მა. ქვეყნის მასშტაბით გამოიკითხა 1500 ადამიანი. ცდომილების ზღვარი არ აღემატება +/- 2.5 პროცენტს.