სამთავრობო კომისიამ „ოცნების ქალაქში“ 1551 ოჯახი დაარეგისტრირა

სამთავრობო კომისია „ოცნების ქალაქში“ მცხოვრები ოჯახების რეგისტრაციას აგრძელებს. კომისიის თავმჯდომარის რამაზ ჯინჭარაძის ინფორმაციით, ამ დროისთვის „ოცნების ქალაქში“ 1551 ოჯახია დარეგისტრირებული. სამთავრობო კომისიას დასახლებაში სულ 1 727 ჯიხური აქვს აღრიცხული.

კომისიას ჯერჯერობით არ აქვს დაზუსტებული ინფორმაცია დარეგისტრირებული ოჯახებიდან ზუსტად რამდენს აქვს საკუთრება, თუმცა იციან, რომ რეგისტრაცია ასეთმა ოჯახებმაც გაიარეს.

რამაზ ჯინჭარაძის განმარტებით, იმ შემთხვევაში, თუ მოქალაქეს ალტერნატიული საცხოვრებელი აქვს, მთავრობა ბინას არ მისცემს: „ უნდა მიხვდეს ასეთი ოჯახი და თავისით წავიდეს, ასეთ მოქალაქეებს პასუხს ოფიციალურად წერილობით გავუგზავნით.“

აჭარის მთავრობა „ოცნების ქალაქში“ მცხოვრებლებისთვის ბინების მშენებლობას გეგმავს. გამოცხადდა ტენდერი და პირველი მრავალბინიანი სახლის ასაშენებლად გამარჯვებულიც გამოვლინდა.

ე.წ. „ოცნების ქალაქი“ ბათუმთან ახლოს, ხელვაჩაურში, ყოფილი სამხედრო ბატალიონის ტერიტორიაზე 2012 წელს, საპარლამენტო არჩევნების შემდეგ გაჩნდა. ყოფილი 25-ე და 53-ე სამხედრო ბატალიონების ბაზების ტერიტორიაზე ოჯახებმა, რომელთა ნაწილი აცხადებდა, რომ ეკომიგრანტები იყვნენ ან არ გააჩნდათ საცხოვრებელი, ხის ფიცრულები ააგეს და დასახლდნენ, თუმცა, თანდათან ხის ნაგებობებს კაპიტალური შენობები ჩაენაცვლა.

ტერიტორია, სადაც „ოცნების ქალაქია“ გაშენებული, აჭარის ავტონომიური რესპუბლიკის საკუთრებაა.

„ოცნების ქალაქში“ მცხოვრები ოჯახების რეგისტრაცია 2019 წლის 9 თებერვალს დაიწყო.

ამავე თემაზე:

კომისია: ოცნების ქალაქში რეგისტრირებული ოჯახების ნაწილს აღმოაჩნდა საკუთრება