ბაგრატიონისა და სულაბერიძის ქუჩების გადაკვეთაში არსებული შუქნიშანი, რომელიც ავტოსაგზაო შემთხვევის შედეგად დაზიანდა, მერიას არ აღუდგენია. ავარია, რის გამოც შუქნიშანი დაიმტვრა, 2 იანვარს მოხდა.
ამავე ქუჩაზე მცხოვრები ერთ-ერთი მოქალაქე თენგიზ თებიძე, „ბათუმელებთან“ ამბობს, რომ აღნიშნულ ქუჩაზე ავტომანქანების ინტენსიური მოძრაობის გამო, ქუჩის უსაფრთხოდ გადაკვეთა შუქნიშნის გარეშე სახიფათოა.
„ერთი შუქნიშანი ავარიის დროს მოიგლიჯა, დანარჩენი სამიც ჩაქრა. მუნიციპალური ავტობუსი, რომელიც მუდმივად გადატვირთულია მგზავრებით, ბავშვებით, უსაფრთხოდ ვერ კვეთს ქუჩას. რამდენიმე წუთი ელოდება, რომ იქნებ რომელიმე ავტომანქანამ დაუთმოს გზა. ასეთი მდგომარეობაა მთელი თვე. აქვეა სკოლა, საბავშვო ბაღი და ბავშვებს ამ „ბონდის ხიდზე“ უწევთ გადაადგილება“, – გვეუბნება თენგიზ თებიძე.
მოქალაქე ამბობს, რომ მდგომარეობის გამოსასწორებლად 112-ში დარეკა, საპატრულო პოლიციაში კი უთხრეს, რომ მოთხოვნა ბათუმის მერიას გადაუგზავნეს.
ბათუმში შუქნიშნებთან დაკავშირებული საკითხების მოგვარება „ბათუმის ავტოტრანსპორტის“ ფუნქციებში შედის. როგორც ამ ორგანიზაციის პრესსამსახურში „ბათუმელებს“ ეუბნებიან, უკვე დაწყებულია ამ საკითხზე მუშაობდა და „შუქნიშნის პრობლემა დაახლოებით ერთ კვირაში მოგვარდება“.
ბაგრატიონისა და სულაბერიძის ქუჩების გადაკვეთაში ავტოსაგზაო შემთხვევის შედეგად ერთი თვის წინ დაზიანებული შუქნიშანი, მერიას არ განუახლებია.
