ხულოში, სოფელ ხაჭაურში, ხანძრის შედეგად ორი საცხოვრებელი სახლი და სათავსოები მთლიანად დაიწვა. ხანძარმა ორი ადამიანის – 70 წლის კაცის და ახალგაზრდა ქალის სიცოცხლე იმსხვერპლა.
როგორც ხულოს მერის მოვალეობის შემსრულებელი ვახტანგ ბერიძე „ბათუმელებთან“ ამბობს, ხანძრის შედეგად გარდაცვლილი ადამიანების დაკრძალვის ხარჯებს მუნიციპალიტეტის მერია დაფარავს.
მერია ასევე ფინანსურად დაეხმარება ორ ოჯახს, რომლებიც ხანძრის შედეგად უსახლკაროდ დარჩნენ. ვახტანგ ბერიძის ინფორმაციით, ამ დროისთვის შვიდი ადამიანია უსახლკაროდ დარჩენილი, რომლებიც დროებით საცხოვრებელში ქირით გადავლენ.
„დაზარალებულ ოჯახებს მთავრობის დადგენილების შესაბამისად, 10-10 ათასი ლარით დავეხმარებით“, – აცხადებს მერის მოვალეობის შემსრულებელი.
ხანძარი სოფელ ხაჭაურში, გუშინ, 19 ოქტომბერს გაჩნდა. გამოძიება სსკ-ის 187-ე მუხლის მე-4 ნაწილით მიმდინარეობს, რაც გულისხმობს ნივთის დაზიანებას ან განადგურებას, ჩადენილს ცეცხლის წაკიდებით, რამაც გაუფრთხილებლობით ორი ან მეტი ადამიანის სიცოცხლის მოსპობა გამოიწვია.
