უკანონოდ აშენება-მიშენების ფაქტები ბათუმში ისევ ხშირია. ასეთი მშენებლობები მერიის ზედამხედველობის სამსახურის მიერ გაფრთხილებისა და დაჯარიმების მიუხედავად მაინც გრძელდება. ბათუმში ამ დრომდე არსებული პრაქტიკით კანონდამრღვევი მოქალაქეები და სამშენებლო კომპანიებიც იმედოვნებენ, რომ უკანონოდ აშენებულ ფართობებს მერია მოგვიანებით დააკანონებს. მსგავსი ფართობების დაკანონების შესაძლებლობას კანონმდებლობა მერიას აძლევს, შესაბამისი პროექტის წარდგენის შემთხვევაში.
ბათუმის მერი, ლაშა კომახიძე არ უარყოფს, რომ პრობლემა აქტუალურია და მერიას მისი გადაჭრის კომპეტენცია შეზღუდული აქვს:
„კონკრეტულ მშენებლობებზე ზედამხედველობისა და მუნიციპალიტეტის კომპეტენციები შეზღუდულია. ჩვენ ვმოქმედებთ და ვრეაგირებთ იმ მოთხოვნების ფარგლებში, რისი უფლებაც გვაქვს. იმისთვის, რომ გავზარდოთ უფლებამოსილება და ჩვენი ინსტრუმენტები გამოვიყენოთ, ამ ინიციატივით მივმართეთ აჭარის უმაღლეს საბჭოს იმისათვის, რომ გაგვიწიონ შუამდგომლობა, საქართველოს პარლამენტში საკანონმდებლო ცვლილებებთან დაკავშირებით.
მუშაობის პროცესში მქონდა ისეთი შემთხვევა, როდესაც მიუხედავად სამჯერ გაფრთხილებისა, მაინც მოახერხა მშენებელმა წვიმიან ამინდში კუსტარულად დაესხა ზედმეტი სართული. მე შემიძლია მის გასაგონადაც და ნებისმიერი სხვა დამრღვევის გასაგონადაც ვთქვა, რომ არავითარი შემდგომი „გაპრავება“, შემდგომი ჩარჩოებში მოქცევა ასეთი ამბების აღარ მოხდება. ეს არის პრინციპული საკითხი“.
