ბათუმისთვის ახალი ავტობუსების შესყიდვაზე ტენდერში წინადადებების მიღება დღეს, 2018 წლის 15 მარტს, შეწყდა. ბათუმის მერიის ინფორმაციით, ტენდერში წინადადება მხოლოდ ერთმა კომპანიამ წარადგინა. ამ ეტაპზე ბათუმისთვის ევროდიზელზე მომუშავე 30 ავტობუსი უნდა შეისყიდონ. შემდეგი ტენდერი უკვე ელექტროავტობუსების შემოყვანაზე გამოცხადდება.
დღესვე ბათუმის მერიაში ახალი ავტობუსების შეძენასთან დაკავშირებით სატენდერო პაკეტი გაიხსნა. მერიის ინფორმაციით, წინადადება უკრაინულ-იაპონურმა კომპანიამ – „ჩერკასკი ავტობუსმა“ წარმოადგინა. კომპანია მერიას „ისუზუ ატამანის“ მოდელის ავტობუსების მიწოდებას სთავაზობს. მერიის ინფორმაციით, ავტობუსები ადაპტირებული იქნება.
სატენდერო კომისია შეისწავლის კომპანიის წინადადებას და ამის შემდეგ მიიღებს გადაწყვეტილებას მასთან ხელშეკრულების გაფორმებაზე. საამისოდ მერიას ორი თვის ვადა აქვს.
„ტენდერის ტექნიკური პირობების მიხედვით, ავტობუსი 60 ადამიანზე [ჯდომით და დგომით] იქნება გათვლილი და არსებულ ავტობუსებთან შედარებით ახალი სატრანსპორტო საშუალება 50%-ით ეკონომიური იქნება. ბათუმის ავტობუსების პროექტის დასაფინანსებლად ბათუმის მერიამ დაბალპროცენტიანი სესხი და 1,5 მილიონი ევრო მიიღო გრანტის სახით. ბათუმის საავტობუსო პარკს 10 ელექტრო და 30-მდე დიზელზე მომუშავე ავტობუსი შეემატება, რისთვისაც 7 მლნ ევრო დაიხარჯება. პროექტის განსახორციელებლად, საქართველოს მთავრობასა და EBRD-ს შორის სასესხო ხელშეკრულება 2017 წლის 13 ივლისს გაფორმდა,“ – აცხადებს ბათუმის მერია.
ახალი ავტობუსების შესყიდვაზე ევროპის რეკონსტრუქციისა და განვითარების ბანკმა [EBRD] ტენდერი მიმდინარე წლის 30 იანვარს გამოაცხადა.
