ბათუმის საკრებულოში რიგგარეშე სხდომა ჩანიშნეს. 27 თებერვალს საკრებულო ზვიად გამსახურდიას #11-ში 2013 წლის სექტემბერში ხანძრით დაზარალებული ოჯახების საცხოვრებლით დაკმაყოფილების საკითხი უნდა გინიხილონ და დაამტკიცონ.
დაზარალებულ ცხრავე ოჯახს მერია ბინებს მუნიციპალიტეტის საბინაო ფონდიდან გადასცემს.
ძველ ბათუმში, ზვიად გამსახურდიას #11-ში მდებარე ორსართულიანი სახლი აჭარის მთავრობის თავმჯდომარემ, ზურაბ პატარაძემ, პირველ წარმატებულ მაგალითად დაასახელა, როცა ბათუმის მერიამ მოახერხა მესაკუთრეებთან შეთანხმება მათ საკუთრებაში არსებული ბინების ალტენატიულ ბინებში გაცვლასთან დაკავშირებით.
სახლი კულტურული მემკვიდრეობის ძეგლი არ არის, თუმცა ძეგლის დაცვის ზონაში მდებარეობს. ამ სახლს დაახლოებით ხუთი წლის წინ ხანძარი გაუჩნდა და სახლის შიდა ნაწილი დაიწვა, რის შემდეგაც მესაკუთრებმა მისი აღდგენა ვერ შეძლეს.
საკრებულოს რიგგარეშე სხდომაზე დაგეგმილია ასევე, სახელმწიფო და ქალაქ ბათუმის მუნიციპალიტეტის საკუთრებაში არსებული არასასოფლო-სამეურნეო დანიშნულების მიწის ნორმატიული ფასის დადგენის შესახებ“ ქალაქ ბათუმის მუნიციპალიტეტის საკრებულოს დადგენილების პროექტი.
