შინაგან საქმეთა სამინისტროს განცხადებით, ბესიკ ამირანაშვილი იმერეთის, რაჭა-ლეჩხუმისა და ქვემო სვანეთის პოლიციის დეპარტამენტის დირექტორად დაინიშნა. ის სამსახურებრივი მოვალეობის შესრულებას უკვე შეუდგა.
2016-2017 წლებში ბესიკ ამირანაშვილი საქართველოს შინაგან საქმეთა მინისტრის პირველი მოადგილის თანამდებობაზე მუშაობდა. ის ამ თანამდებობიდან 2017 წლის 9 ივნისს კადრების განკარგულებაში გადაიყვანეს.
შეგახსენებთ, რომ ბესიკ ამირანაშვილის კადრების განკარგულებაში გადასვლას წინ უძღოდა საერთაშორისო სკანდალი, – 29 მაისს, თბილისიდან გაუჩინარდა აზერბაიჯანელი ჟურნალისტი აფგან მუხთარლი, რომელიც ბაქოში იპოვეს დაკავებული. აზერბაიჯანში აფგან მუხთარლის ბრალი სამი მუხლით წაუყენეს, ესენია “კონტრაბანდა”, “საზღვრის უკანონო გადაკვეთა” და “პოლიციისთვის დაუმორჩილებლობა”.
ბესიკ ამირანაშვილი 2015-2016 წლებში შსს-ს აჭარის პოლიციის დეპარტამენტის დირექტორი იყო. მანამდე კი შსს-ს კახეთისა და შემდეგ იმერეთის, რაჭა-ლეჩხუმისა და ქვემო სვანეთის სამხარეო მთავარი სამმართველოების უფროსად მუშაობდა.
ბესიკ ამირანაშვილი მიმდინარე წლის ივნისში კადრების განკარგულებაში ისე გადაიყვანეს, რომ ამის შესახებ შს სამინისტროს განმარტება არ გაუკეთებია. ბესიკ ამირანაშვილი შს სამინისტროს ყველაზე მაღალი თანამდებობის პირი იყო, ვინც ბათუმში იმყოფებოდა 11-12 მარტის აქციის ღამეს. იმ ღამეს ქალაქში დაიწვა 6 ავტომანქანა და სხვა სახის სისხლის სამართლის დანაშაულიც მოხდა, მაგრამ პოლიცია, მათ შორის ამირანაშვილი ამ ყველაფერს რამდენიმე საათის განმავლობაში თვალყურს უმოქმედოდ ადევნებდა.
აჭარის პოლიციის დეპარტამენტის დირექტორად ბესიკ ამირანაშვილის შემდეგ ლაშა გოგნიაშვილი დაინიშნა, რომელიც დღემდე ამ თანამდებობაზეა. ლაშა გოგნიაშვილი ბესიკ ამირანაშვილის კადრია. ისინი 2015 წელს ერთად ჩამოვიდნენ ბათუმში სამუშაოდ.
აჭარის პოლიციის დეპარტამენტში საკადრო ცვლილებებზე ჯერ-ჯერობით არ საუბრობენ. ამ დროისთვის აჭარაში შსს-ს ხელვაჩაურის, შუახევისა და ხულოს პოლიციის სამმართველოების უფროსების თანამდებობები ვაკანტურია.
