გიორგი მარგველაშვილი

პრეზიდენტის კომენტარი დიდინეძში მომხდარ ინციდენტზე

დღეს ბათუმში საკონსტიტუციო სასამართლოში ახალი მოსამართლეების ფიცის დადების ცერემონიალის შემდეგ საქართველოს პრეზიდენტმა, გიორგი მარგველაშვილმა ზუგდიდში, სოფელ დიდინეძში მომხდარ ინციდენტთან დაკავშირებით გააკეთა კომენტარი:

„ერთი მხვრივ, მოველი ეფექტურ და სწრაფ გამოძიებას, მაგრამ ამავე დროს მოველი პოლიტიკოსებისგან ადეკვატურ შეფასებას. მე არაერთხელ აღვნიშნე, რომ ფაქტობრივად ყველა პოლიტიკურ ძალაში შესაძლებელია იყვნენ თავქარიანი ადამიანები, რომლებსაც მიაჩნიათ, რომ არჩევნები არის მუშტი-კრივი. მაგრამ ასევე მოველი, რომ პოლიტიკურ ძალებში არიან ადამიანები, რომლებიც თავის პრინციპულ პოზიციას თუნდაც თანაგუნდელებთან დაკავშირებით დააფიქსირებენ.“

პირველ ოქტომბერს ზუგდიდის სოფელ დიდინეძში “ქართული ოცნების” ახალგაზრდული ორგანიზაციის წევრებს სცემეს. პარტიაში აცხადებენ, რომ ფიზიკური შეურაცხყოფა ახალგაზრდებს საარჩევნო ფლაერების დარიგებისას მიაყენეს.

როგორც „ქართულ ოცნებაში“ „ნეტგაზეთს“ განუცხადეს, ნაცემია რამდენიმე პირი, მათ შორის ერთ-ერთი ახალგაზრდა ქალი მძიმედაა დაშავებული და ამ დროისათვის საავადმყოფოში იმყოფება. პარტიაში ამბობენ, რომ ფიზიკური შეურაცხყოფა მათ „ნაციონალური მოძრაობის“ ნასვამმა აქტივისტებმა მიაყენეს, რომლებიც ახალგაზრდა აქტივისტების პროვოცირებას ცდილობდნენ.

საქართველოს შინაგან საქმეთა სამინისტროში გაგვიცხადეს, რომ პოლიცია აღნიშნულ საქმეს სისხლის სამართლის კოდექსის 125-ე მუხლით იძებს, რაც ცემას გულისხმობს.

ნეტგაზეთის მასალების სხვა გამოცემებში გადაბეჭდვის წესი
როინ გუნდაძე