„პატრიოტთა ალიანსის“ აქცია ბათუმში

დღეს 1 ოქტომბერს ბათუმში ევროპის მოედანზე, „პატრიოტთა ალიანსის“  წინასაარჩევნო აქცია გაიმართა. ბათუმში იმყოფებიან პარტიის ლიდერები  დავით თარხან-მოურავი და ირმა ინაშვილი, ასევე მათი მაჟორიტარი კანდიდატები ბათუმში.  პარტიის ლიდერები აქციაზე აცხადებდნენ, რომ „ამდენი ბათუმელი არავის, არასდროს არ შეუკრებია ამ მოედანზე“. თუმცა,  საკუთარი მხარდამჭერები თითქმის ყველა რეგიონიდან სპეციალურად ამ აქციაზე დასასწრებად ჩამოიყვანეს. მათ შორის  გურიიდან, იმერეთიდან, სამეგრელოდან, ჭიათურიდან, გორიდან.

გადახედეთ რამდენიმე ადამიანი შეიკრიბა, ისე კი არ არის, „ნაციონალურმა მოძრაობამ“ 500 კაცი რომ ჩამოიყვანეს მარშრუტკებით, მთელი ბათუმი აქ არის“, – ამბობდნენ  პარტიის ლიდერები.

„პატრიოტთა ალიანსის“ მხარდამჭერ აქციაზე იმყოფებოდა სასულიერი პირი ჭიათურიდან. ის სახელს და გვარს არ გვეუბნება, თუმცა დასძენს, რომ პარტიის მხარდამჭერია და საკუთარი სურვილით ჩამოვიდა.  „მინდოდა და მოვედი… სახელი-გვარი არაა საჭირო“, – თქვა მან.

სასულიერიო პირი ჭიათურიდან.
ბათუმში „პატრიოტთა ალიანსის“ აქციაზე.

„ზუგდიდიდან  ვართ. რამდენი ვართ და ბევრი. პარტიამ უზრუნველყო ჩვენი ჩამოყვანა“, – გვეუბნება ერთ-ერთი მონაწილე. ვინაობას არც ის ამხელს.  კიდევ ერთი მონაწილის თქმით:  „პატრიოტთა ალიანსმა“ ჩამოგვიყვანა. სენაკიდან  ვარ. არიან ხობიდან და ჩხოროწყუდანაც, ყველა აქ ვართ“.

„გურიიდან, კონკრეტულად ჩოხატაურიდან ვართ ჩვენ , სადღაც 150 ადამიანია გურიიდან  ჩამოსული“, – გვითხრეს აქციის მონაწილეებმა  ია რამიშვილმა და გულნაზ კალანდაძემ.

აქციაზე  შუახევის მუნიციპალიტეტიდან ჩამოსული პირებიც იმყოფებიან, თუმცა ვინაობა არც მათ გაამხილეს.

ბათუმელი ოთარ გაბელიას თქმით კი, ის  აქციაზე  იმიტომ მოვიდა, რომ  მისთვის  მისაღებ „რაღაც-რაღაცეებს ლაპარაკობენ“.

„ საქართველოსთვის უნდათ კარგი და თურქებისთვის რომ არ უნდათ ეს საქართველო, იმიტომ მოვედი. ისეთ რაღაც-რაღაცეებს ლაპარაკობენ, რაც ჩემთვის მისაღებია. თუნდაც ის, რომ   „ნაციონალებს“  ჩამოათრევენ  და მის ადგილს მიუჩენენ“.

„პატრიოტთა ალიანსის“ აქცია ბათუმში, ევროპის მოედანზე

მალხაზ არჩევაძე ამბობს, რომ წარმოშობით ბათუმიდანაა, თუმცა ახლა იმერეთში ცხოვრობს.

„პატრიოტთა ალიანსი“ თავის საარჩევნო პროგრამაში ღიად ეწევა ანტითურქულ კამპანიას და აცხადებს, რომ  ბათუმში 40 ათასი თურქი ცხოვრობს და რომ  თურქეთს, აჭარის და აფხაზეთის მიერთების სურვილი აქვს.