აჭარის მთავრობა: მოსახლეობა უსახსრობის გამო სამედიცინო დაწესებულებას დაგვიანებით მიმართავს

აჭარის მთავრობაში მიიჩნევენ, რომ მიუხედავად სახელმწიფო და ადგილობრივი პროგრამებისა, რაც ჯანმრთელობის დაცვის მიზნით ხორციელდება,  სხვადასხვა სოციალურად დაუცველი კატეგორიის ადამიანებისთვის მაინც ხელმიუწვდომელი რჩება ზოგიერთი ფასიანი სამედიცინო მომსახურება.

„ისინი მოკლებულნი არიან საშუალებას, მიიღონ დროული სამედიცინო დახმარება. უსახსრობის გამო სამედიცინო დაწესებულებებს მიმართავენ დიდი დაგვიანებით, დაავადებების გართულებული ფორმებით, რომელთა მკურნალობა უფრო დიდ ხარჯებთანაა დაკავშირებული. შედეგად იზრდება მკურნალობასთან დაკავშირებული ფინანსური რისკები, დაავადების გართულებების ალბათობა“, – ნათქვამია აჭარის რესპუბლიკური ბიუჯეტის 2019 წლის პროექტის განმარტებით ბარათში.

პროექტი აჭარის მთავრობამ უმაღლეს საბჭოში განსახილველად უკვე გადააგზავნა.

სამედიცინო მომსახურების მისაწვდომობის გაზრდის მიზნით მთავრობა მომავალ წელს ჯანდაცვის სამინიტროს ბიუჯეტის მილიონი ლარით გაზრდას გეგმავს, ნამატი თანხა სხვადასხვა პროგრამაში გადანაწილდება.

პროექტის მიხედვით, მილიონ 141 700-მდე ლარით იზრდება ბავშვთა ფსიქოსომატური აბილიტაცია-რეაბილიტაციის ქვეპროგრამა. გასულ წელს ამ პროგრამის ბიუჯეტი 815 000 ლარი იყო. 2018 წლის რესპუბლიკური ბიუჯეტის სამი კვარტალის ანგარიშის მიხედვით, ამ პროგრამის ფარგლებში სამ კვარტალში გაცემულია 3 191 ვაუჩერი,  დასრულებული და ანაზღაურებულია 2 600, ხოლო 591 პაციენტი აგრძელებს რეაბილიტაციას.

200 000 ლარი ემატება მოსახლეობის ინდივიდუალურ სამედიცინო დახმარებას. ამ პროგრამის ფარგლებში კი, 2018 წლის ბიუჯეტიდან დასრულებული და ანაზღაურებულია 1 059, ხოლო 477 პაციენტი აგრძელებს მკურნალობას.

150 000 ლარით გაიზრდება ზოგიერთი სოციალური კატეგორიის მოსახლეობის სამედიცინო მომსახურების თანადაფინანსება.

600 000 ლარით იზრდება სამედიცინო და სოციალური რეაბილიტაციის პროგრამა, რომელიც მოიცავს სქოლიოზით დაავადებულ ბავშვთა რეაბილიტაციას, შეზღუდული შესაძლებლობის სტატუსის მქონე ბავშვთა სოციალურ ადაპტაციას, ბავშვთა ადრეულ განვითარებასა და აუტიზმის სპექტრის დარღვევების მქონე ბავშვთა რეაბილიტაციას.

აჭარის ავტონომიური რესპუბლიკის ჯანმრთელობისა და სოციალური დაცვის სამინისტრო 2018 წელს რვა პროგრამას ახორციელებს.

 

ნეტგაზეთის მასალების სხვა გამოცემებში გადაბეჭდვის წესი


ავტორი