ქედის მერიამ 35 პედაგოგი დააჯილდოვა

პედაგოგთა საერთაშორისო დღის კვირეულის ფარგლებში, ქედის მუნიციპალიტეტის მერიამ სხვადასხვა დარგში მოღვაწე 35 პედაგოგი დააჯილდოვა.

მუნიციპალიტეტის პირველმა პირებმა, ქედის რესურსცენტრის ხელმძღვანელთან ერთად, სოფელ კოლოტაურში, არასრული საშუალო სკოლის 81 წლის პედაგოგს – ნოდარ სალაძეს საგაკვეთილო პროცესის მიმდინარეობისას მოულოდნელად ეწვივნენ და თარიღი საჩუქრებით მიულოცეს.

მოულოდნელმა სტუმრობამ უხუცესი პედაგოგი ძალიან გაახარა. ბატონი ნოდარი დღემდე დიდი შემართებითა და სიყვარულით მუშაობს ქიმია-ბიოლოგიის მასწავლებელად, აქვს პედაგოგიური მოღვაწეობის 55-წლიანი გამოცდილება და ამბობს, რომ ეს მოსწავლეების სიყვარულმა შეაძლებიანა.

71 წლის შუშანა დავითაძეს ახოს საჯარო სკოლამ აქტიური პედაგოგიური მოღვაწეობიდან გაცილების საღამო სიმბოლურად, მასწავლებელთა დღეს მოუწყო. ნახევარსაუკუნოვანი პედაგოგიური გამოცდილების მასწავლებელი ქედის მერიამ დააჯილდოვა და მადლობა გადაუხადა მაღალპროფესიული საქმიანობისათვის.

ქედის მერმა ლევან გორგილაძემ პროფესიული დღე ასევე საჩუქრებით მიულოცა ქედის სახელოვნებო სკოლის ღვაწლმოსილ პედაგოგს, სასპორტო სკოლის ჭადრაკის სექციის სერტიფიცირებულ მწვრთნელს, ბაგა-ბაღების გაერთიანების ფსიქოლოგს და ქედის კულტურის ცენტრის მოსწავლე-ახალგაზრდობის გობელენის წრის ხელმძღვანელს. შეხვედრაზე ქედის მერმა მათი საქმიანობის მნიშვნელობაზე ისაუბრა.

11 ოქტომბერს კი, ქედის მუნიციპალიტეტის საჯარო სკოლების 29 პედაგოგი ქედის მერმა ლევან გორგილაძემ, აჭარის არ განათლების, კულტურისა და სპორტის მინისტრთან ინგა შამილიშვილთან და საკრებულოს თავმჯდომარესთან შუქრი თურმანიძესთან ერთად დააჯილდოვა.

პედაგოგებს პროფესიული დღე სხვადასხვა აქტივობით მიულოცეს მშვიდობის კორპუსის მოხალისეებმაც.  ქედის რესურსცენტრისა და დაბა ქედის საჯარო სკოლის ორგანიზებით, დაჯილდოებამდე გაიმართა ღონისძიება, რომელსაც ადგილობრივი პოეტი, პედაგოგი – ნათელა დუმბაძე უძღვებოდა.

კვირეული ქედის მუნიციპალიტეტში უკვე დასრულდა, პროგრამის ბიუჯეტი 2 300 ლარი იყო.

ნეტგაზეთის მასალების სხვა გამოცემებში გადაბეჭდვის წესი


ავტორი