სასამართლომ მშენებლობა შეაჩერა, დეპუტატ ხვიჩა შარაშიძის კომპანია მაინც არ ჩერდება

ბათუმის საქალაქო სასამართლოს გადაწყვეტილების მიუხედავად, უმაღლესი საბჭოს წევრის, დეპუტატ ხვიჩა შარაშიძის კომპანია მშენებლობას არ აჩერებს. მშენებლობის მომიჯნავე სახლში მცხოვრებლებმა, რომლებიც კომპანიას სასამართლოში კუთვნილი სივრცის ათვისების გამო ედავებიან, ამასთან დაკავშირებით დღეს პოლიციას მიმართეს და სასამართლო გადაწყვეტილების აღსრულება მოითხოვეს.

მოსარჩელეების იურისტის, გიორგი ხიმშიაშვილის ინფორმაციით, სასამართლოს განჩინების შეუსრულებლობის გამო გამოძიება დაწყებულია სისხლის სამართლის კოდექსით.

„მოპასუხე შპს „ჩემ სახლს” აეკრძალოს ქ. ბათუმში, ს. ხიმშიაშვილის ქ. N20-ის მიმდებარედ არსებულ უძრავ ქონებაზე… IV კლასს მიკუთვნებული საცხოვრებელი კორპუსის მშენებლობის გაგრძელება ერთი თვის ვადით“, – ეს განჩინება მოსამართლე სალიხ შაინიძემ 25 ივლისს გამოსცა. კომპანიას სასამართლოში მშენებლობის გვერდით მცხოვრებმა ორმა პირმა უჩივლა.

საქმე იმაშია, რომ აჭარის უმაღლესი საბჭოს წევრის სამშენებლო  კომპანიამ ცოტა ხნის წინ მისი სამშენებლო ტერიტორიის მეზობლად სამსართულიან სახლზე სახანძრო კიბე მოჭრა და ფანჯრებთან კედელი ამოაშენა. ახლა კი  მეზობელი სახლის სახურავის სივრცეც აითვისა ისე, რომ „აქ მცხოვრებლებს მომავალში ამ სივრცის გამოყენების შესაძლებლობა წაართვა“.

კომპანია„ ჩემი სახლი“ სამშენებლო სამუშაოებს აგრძელებს

გვინდოდა გვეკითხა, რატომ არ ასრულებს სასამართლო გადაწვეტილებას კომპანია, მაგრამ კომპანიის იურისტმა ამირან ცეცხლაძემ სატელეფონო ზარებს არ უპასუხა. კომპანიის დირექტორის გოჩა შერვაშიძის თქმით კი, ამ თემაზე კომპენტარი მან უნდა გააკეთოს.

ამავე თემაზე:

სასამართლომ დეპუტატ ხვიჩა შარაშიძის კომპანიას მშენებლობა შეუჩერა – მან ამის შესახებ არ იცის

ნეტგაზეთის მასალების სხვა გამოცემებში გადაბეჭდვის წესი


ავტორი