ჩაქვისწყლის სათავე ნაგებობაზე 187 450 ლარად დამცავ კედელს მოაწყობენ

სოფელ ხალაში, მდინარე ჩაქვისწყლის სასმელი წყლის ნაგებობის მიმდებარედ მდინარის სანაპიროს გამაგრებისთვის „ბათუმის წყალი“ 187 450 ლარს ტენდერის გარეშე გადაიხდის. შესაბამისი ნებართვა კომპანიას აქვს. ნაპირგამაგრებისთვის მონოლითური რკინა-ბეტონის ჯებირი მოეწყობა. ამ სათავე ნაგებობიდან ხდება ქალაქ ბათუმისა და მისი მიმდებარე ტერიტორიების სასმელი წყლით უზრუნველყოფა.

„ბათუმის წყლის“ ინფორმაციით, ოქტომბრის თვეში მოსულმა ნალექმა დააზიანა სასმელი წყლის სათავე ნაგებობაზე წყალმიმღებ კაშხალთან მისასვლელი გზა და დამცავი ზღუდე, რის გამოც ვერ ხერხდება მდინარის მიერ კაშხალთან ჩამოტანილი ქვა-ღორღის გატანა. კომპანიის განცხადებით კაშხალი დროულად უნდა გაიწმინდოს, წინააღმდეგ შემთხვევაში წყალმიმღები მდინარის ნატანით გაივსება, რამაც შესაძლოა საერთოდ მოშალოს კაშხალი და საფრთხე შეუქმნას ბათუმის სასმელი წყლით მომარაგებას.

სათავე ნაგებობაზე საყრდენი კედლის მოწყობასა და წყალმიმღებ კაშხალთან მისასვლელი გზის პროექტისა და ხარჯთაღრიცხვის მომზადებაში „ბათუმის წყალმა“ ცალკე, 3 000 ლარი გადაიხადა.

„აჭარა გამოირჩევა უხვი ნალექიანობით, რის გამოც არსებობს საფრთხე, რომ სრულიად მოიშალოს წყალმიმღებზე მისასვლელი გზა, რომელიც გამოიყენება კაშხალზე მდინარის მიერ მოტანილი ქვა-ღორღის გასატანად და მძიმე ტექნიკის მისასვლელად… აღნიშნული პრობლემის მოგვარების მიზნით აუცილებელია დროულად მოხდეს საყრდენი კედლის მოწყობა რკინა-ბეტონის კონსტრუქციით და მისასვლელ გზის აღდგენა ბეტონის საფარით. აღნიშნული სამუშაოების დასრულება უნდა მოხდეს ხელშეკრულების დადებიდან არაუგვიანეს ერთი თვის განმავლობაში, რაც ტენდერის გამოცხადების შემთხვევაში შეუძლებელია. [აღნიშნული სამუშაოებისთვის] გეგმით გათვალისწინებული გვაქვს 640 000 ლარი“ – აცხადებს „ბათუმის წყალი“.

შპს „ბათუმის წყალი“-ს 100% წილის მფლობელი ბათუმის მერიაა.

ჩაქვის სათავე ნაგებობა / ფოტო: „ბათუმის წყალი“

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com