მთავარი,მთიანი აჭარა,სიახლეები

ბათუმში წყლის ფასი მოსახლეობასაც გაუძვირდა – ახალი ტარიფი

26.01.2024 • 8606
ბათუმში წყლის ფასი მოსახლეობასაც გაუძვირდა – ახალი ტარიფი

კომპანია „ბათუმის წყლის“ ინფორმაციით, „2024 წლის 1-ლი იანვრიდან შეიცვალა წყლისა და წყალარინების ტარიფები, რომელიც ძირითადად ვრცელდება არასაყოფაცხოვრებო [კომერციულ] ობიექტებზე“, თუმცა, ამავე კომპანიის მონაცემებით, გამოდის, რომ წყლის ტარიფი იანვრიდან ბათუმში გამრიცხველიანებულ საყოფაცხოვრებო მომხმარებლებსაც გაეზარდათ.

ბათუმში მოსახლეობა აქამდე თუ 1 კუბურ მეტრ მოხმარებულ წყალში 0,50 ლარს იხდიდა, 2024 წლის იანვრიდან უკვე 0,51 ლარს გადაიხდის.

„ბათუმის წყლის“ მონაცემებით:

  • საყოფაცხოვრებო გამრიცხველიანებული მომხმარებელი 2024 წლის იანვრიდან წყალსა და წყალარინებაზე მთლიანობაში გადაიხდის 0.51802 ლარს 1 კუბურ მეტრ მოხმარებულ წყალზე. ამ დრომდე კი ეს გადასახადი ცოტათი ნაკლები იყო – 0.50976 ლარი 1 კუბურ მეტრ მოხმარებულ წყალზე.
  • არასაყოფაცხოვრებო [კომერციული] ობიექტი 2024 წლის იანვრიდან წყალსა და წყალარინებაზე მთლიანობაში გადაიხდის 5.86932 ლარს 1 კუბურ მეტრ მოხმარებულ წყალზე. ამ დრომდე კი ეს გადასახადი სულ ცოტა 10 თეთრით ნაკლები იყო – 5.76548 ლარი 1 კუბურ მეტრ მოხმარებულ წყალზე.
  • რაც შეეხება იმ მოსახლეობას [საყოფაცხოვრებო მომხმარებელს], ვინც წყლის გადასახადს სულადობით იხდის, „ბათუმის წყლის“ ინფორმაციით, მათთვის გადასახადი არ გაძვირებულა და ტარიფი დარჩა იგივე – თვეში 2.6255 ლარი 1 სულზე.

„ბათუმის წყალი“ აცხადებს, რომ წყლისა და წყალარინების ტარიფები საქართველოს ენერგეტიკისა და წყალმომარაგების მარეგულირებელი ეროვნული კომისიის [სემეკი] დადგენილებით შეიცვალა.

სემეკმა 2023 წლის 28 დეკემბრის დადგენილებით შპს „ბათუმის წყლის“ მომხმარებლებისთვის წყალმომარაგების ზღვრული ტარიფები [ზედა ზღვარი] დაადგინა. ახალი დადგენილება 2024 წლის 1-ლი იანვრიდან ამოქმედდა და ის ძალაში 2027 წლის 1-ელ იანვრამდე დარჩება.

ამ დადგენილებით ბათუმში:

  • გამრიცხველიანებული საყოფაცხოვრებო მომხმარებლებისთვის [მოსახლეობისთვის] წყალმომარაგების ზღვრული ტარიფი დადგინდა – 0.439 ლარი 1 კუბურ მეტრ მოხმარებულ წყალზე
  • არასაყოფაცხოვრებო მომხმარებლებისთვის [კომერციული ობიექტებისთვის] კი წყალმომარაგების ზღვრული ტარიფი – 4.974 ლარი 1 კუბურ მეტრ მოხმარებულ წყალზე.

ეს არის ტარიფის ზედა ზღვარი, რომელსაც მოსახლეობის/კომერციული ობიექტების მიერ, გადახდის დროს, დამატებითი ღირებულების გადასახადიც [დღგ] ემატება.

სემეკის მიერ დადგენილი ზღვრული ტარიფი კომპანიისთვის ნიშნავს, რომ მას შეუძლია დაადგინოს ნებისმიერი ტარიფი, რომელიც არ უნდა იყოს ამ ზღვრულ ტარიფზე მეტი, ანუ შესაძლებელია გადასახადი იყოს ზედა ზღვარზე ნაკლებიც.

„ბათუმის წყალმა“ კი, ამ შემთხვევაში ტარიფი ზუსტად იმ ზედა ზღვრით განსაზღვრა, რომელიც სემეკმა დაადგინა.

გადაბეჭდვის წესი


ასევე: