კვირის ამბები,მთავარი

გაჩერებული “ბაბილონ თაუერი” და სადავო წილები

04.02.2016 • 3069
გაჩერებული “ბაბილონ თაუერი” და სადავო წილები

“ბაბილონ თაუერის” მშენებლობა ისევ შეჩერებულია. მშენებელ კომპანიაში წილების გადანაწილებაზე დავობენ. კომპანია “მეტრო ატლას ჯორჯია” კი არ ადასტურებს გავრცელებულ ინფორმაციას “ბაბილონ თაუერის” მიმდინარე პროექტის შესაძლო შესყიდვის შესახებ.

“ბაბილონ თაუერის” მშენებელმა კომპანია TAM GEO-მ აჭარის მთავრობას უკვე მესამედ მიმართა მშენებლობის დასრულების ვადის გაგრძელების თხოვნით. კომპანია მშენებლობის დასასრულებლად, რომელიც 2012 წელს დაიწყო და 2015 წლის ბოლოს უნდა დასრულებულიყო, კიდევ ორ წელს ითხოვს.

TAM GEO ბათუმში 47-სართულიან კომპლექსს “ბაბილონ თაუერს” აშენებს. მიწის ნაკვეთი რუსთაველის ქუჩაზე, N30-ში, ინვესტორს აჭარის მთავრობის მაშინდელმა თავმჯდომარემ, ლევან ვარშალომიძემ საკუთრებაში პირდაპირი მიყიდვის წესით გადასცა. ამ ნაკვეთთან ერთად ინვესტორს გადასცეს ნინოშვილის ქუჩის N23-ში მდებარე 513,3 კვ.მ სამეცნიერო კვლევითი ინსტიტუტის შენობა და მასზე დამაგრებული 982 კვ/მ არასასოფლო-სამეურნეო დანიშნულების მიწის ნაკვეთი.

აჭარის ფინანსთა და ეკონომიკის სამინისტროს ინფორმაციით, “ბაბილონ თაუერის” მშენებელმა კომპანიამ (TAM GEO) მშენებლობის ვადა არაერთხელ დაარღვია, რაც “შენობის კონსტრუქციული მდგრადობის ამაღლების მიზნით ჩატარებულმა სამუშაოებმა გამოიწვია. კომპანია აჭარის მთავრობამ 2013 წლის დასაწყისში 589 914 ლარის, ხოლო წლის ბოლოს კიდევ 91 372 ლარის ჯარიმისაგან გაათავისუფლა. კომპანიამ აიღო ვალდებულება, რომ დაწყებულ პროექტს მიიყვანს ბოლომდე და დაასრულებს მშენებლობას”, – ნათქვამია წერილში, რომელიც „ბათუმელებმა“ სამინისტროსგან 2015 წლის 13 თებერვალს მიიღო.

გაუგრძელებს თუ არა ხელშეკრულებით ნაკისრი ვალდებულებების შესრულების ვადას მთავრობა კომპანიას? – ამაზე აჭარის ფინანსთა და ეკონომიკის სამინისტროში ჯერ გადაწყვეტილება არ მიუღიათ.

“ვიცით, რომ წილების გადანაწილებაზე კომპანიაში აუდიტი მუშაობს. გადაწყვეტილება ვადის გაგრძელებაზე ჯერ არ მიგვიღია”, – განმარტა “ბათუმელებთან” სამინისტროს იურიდიული სამსახურის უფროსმა გელა ცინცაძემ.

TAM GEO-ს წარმომადგენლები ჟურნალისტებთან არ საუბრობენ: “ვირუსი მაქვს და ვერ დაგელაპარაკებით. არც კომპანიაშია ახლა ვინმე პასუხისმგებელი პირი, რომელსაც შეუძლია პასუხი გაგცეთ”, – უთხრა “ბათუმელებს” კომპანიის წარმომადგენელმა.

მინისტრის ბრძანებაში ასევე ნათქვამია, რომ ფინანსთა და ეკონომიკის მინისტრმა გასულ წელს კომპანია პირგასამტეხლოსგან აჭარის მთავრობის თავმჯდომარის ბრძანების (#150 20/05/2015) საფუძველზე გაათავისუფლა. საგულისხმოა ისიც, რომ კომპანიას, რომელიც სახელმწიფოს წინაშე ვალდებულებებს ვერ ასრულებს, არჩილ ხაბაძემ 2014 წლის სექტემბერში ბათუმის მერთან, გიორგი ერმაკოვთან კ2 კოეფიციენტის 15,50-მდე ანუ მიმდინარე სამშენებლო პროექტის სიმაღლის გაზრდაზე უშუამდგომლა. სარეკომენდაციო წერილში არჩილ ხაბაძე წერდა, რომ „კომპანიას შენობის სიმაღლის 171 მეტრამდე გაზრდა აქვს განზრახული“.

2015 წლის თებერვალში ბათუმის საკრებულომ ის კომპანიები, რომლებიც ბათუმში 30 მილიონზე მეტი დოლარის ინვესტიციას განახორციელებენ, ბუნდოვანი არგუმენტებით, ფასიან ზონაში კ2 მოსაკრებლის ანუ სიმაღლის გადახდისგან გაათავისუფლა. 2014 წელს ამ მოსაკრებლისგან ბიუჯეტში მილიონზე მეტი ლარი შევიდა. საკრებულოს ზოგიერთმა წევრმა ეს გადაწყვეტილება კონკრეტულ ინვესტორს – „ბაბილონის“ მშენებელ კომპანიას დაუკავშირა. ამ თემაზე „ბათუმელების“ სტატიას ინვესტორი გამოეხმაურა და მან საკრებულოს გადაწყვეტილება¬მდე პრემიერ ღარიბაშვილთან შეხვედრა უარყო.

რაც შეეხება წილების გადანაწილების საკითხს, კომპანია TAM GEO 2012 წლის მარტში დაფუძნდა. დამფუძნებელი პარტნიორები იყვნენ თურქული კომპანია „TAMTRADE DIS TICARET VE PAZARLAMA“ – 97% წილით და თურქეთის მოქალაქეები: ომერ ილქნური – 2% და ისმაილ ჰაქქი აიჰანი – 1%. დირექტორად თურქეთის მოქალაქე ირფან კოვუკი დაინიშნა.

კომპანიის პარტნიორები რამდენჯერმე შეიცვალა. ბოლო ცვლილება 2015 წლის მაისში განახორციელეს. დღეის მონაცემებით კომპანიის წილები ასე ნაწილდება: ომერ ილქნური – 1%, ისმაილ ჰაქქი აიჰანი – 1%, ბაირამ ალი ბაირამოღლუ – 50%, ირფან კოვუკი – 3%, მეჰმეთ მეთეჰან ბერქთაში – 45%.

უკავშირდება თუ არა ამჯერად წილების ხელახალი გადანაწილება პროექტის შესაძლო გაყიდვას, ეს მომავალში გამოჩნდება. ამ დროისათვის კი “მეტრო ატლას ჯორჯიას” წარმომადგენელი რაულ კახაძე აცხადებს, რომ მისი კომპანია “ბაბილონ თაუერს” არ ყიდულობს.

გადაბეჭდვის წესი


ასევე: