Batumelebi | დაბინძურებული მუნიციპალური ტრანსპორტი ბათუმში [ფოტო] დაბინძურებული მუნიციპალური ტრანსპორტი ბათუმში [ფოტო] – Batumelebi
RU | GE  

დაბინძურებული მუნიციპალური ტრანსპორტი ბათუმში [ფოტო]

 

ბათუმში  ყოველდღიურად 107 ავტობუსი გადის სამუშაოდ სამარშრუტო ხაზზე. ავტობუსების სალონები ხშირად მოუწესრიგებელია, რაც მგზავრებს დისკომფორტს უქმნის. „ბათუმელები“ დაინტერესდა, როგორ და რა ინტენსივობით ხდება ავტობუსების სანიტარული დასუფთავება. გთავაზობთ ბლიც-ინტერვიუს ბათუმის ავტოტრანსპორტის ხელმძღვანელთან, პაატა დუმბაძესთან. 

 

ბატონო პაატა, ავტობუსის სამარშრუტო ხაზზე გასვლამდე თუ ხდება მისი სანიტარული დამუშავება?

ყოველდღიურად ხდება. როცა ავტობუსი შემოდის ხაზიდან, მუშაობას ასრულებს, ჩვენ გვაქვს ადგილზე სამრეცხაო და ყოველდღიურად ვრეცხავთ ავტობუსის გარე ძარას და  იატაკს.  

 

სალონი თუ ირეცხება და რა პერიოდულობით?

სალონის გარეცხვას რაც შეეხება, მაგას უკვე პერიოდულობით ვაკეთებთ. ყოველდღიურად მაგას დასჭირდება 50 თანამშრომელი. ზუსტად პერიოდულობას ვერ გეუბნებით. ზამთარში სხვა დრო აქვს,  ზაფხულში – სხვა დრო, ამინდს გააჩნია. კონკრეტულად გეგმა-გრაფიკი ამის არ არსებობს.

 

ავტობუსების სალონებში სკამები მოძველებულია,  თუ აპირებთ განახლებას?

სკამებს ვცვლით პერიოდულად. პირველ რიგში, მე დავაბრალებ ამას ჩვენი მოსახლეობის ვანდალურ ფაქტებს და ქმედებებს, რაც ხდება საზოგადოებრივ ტრანსპორტში და მოსაცდელებზე. გვყავს კატეგორია ხალხის, რომელიც აზიანებს ჩვენს ქონებას. შესაბამისად ყველა გატეხვაზე სკამები რომ ვცვალოთ, მაშინ მომსახურებაში არ გვეყოფა მილიონები. მაქსიმალურად ვცდილობთ, რომ არსებული რესურსი გამოვიყენოთ.

 

წვიმის დროს ფანჯრის მხარეს განთავსებულ სკამებზე ხშირად წყალი ჩამოდის. ამ პრობლემის მოგვარებას თუ აპირებთ?

ავტობუსში წვიმის დროს რომ წყალი ჩამოდის, ეგ თქვენგან მესმის პირველად. ეგ უნდა ვნახო მაშინ, მე ვერ ვხვდები რაზე საუბრობთ. თუ ფანჯარა ღია არის წვიმის დროს, მაშინ შემოვა წყალი, მაგრამ თუ ფანჯარა დახურულია და წყალი ჩამოდის, ჭერიდან ხომ არ ჩამოვა. ეგეთი ფაქტი არ ვიცი.

 

მუნიციპალური ავტობუსის სალონი 13.05.2015 ფოტო: სერა ძნელაძე

 

სკამი #7 ავტობუსში 13.05.2015 ფოტო: სერა ძნელაძე

 

 

#11 ავტობუსი 13.05.2015 ფოტო: სერა ძნელაძე

 

 

 

 

 

 

 

ნეტგაზეთის მასალების სხვა გამოცემებში გადაბეჭდვის წესი
მანანა ქველიაშვილი, ფოტო: სერა ძნელაძე