Batumelebi | შვიდი კონკურსი და ორი შედეგი შვიდი კონკურსი და ორი შედეგი – Batumelebi
RU | GE  

შვიდი კონკურსი და ორი შედეგი

 

ბათუმში, წელს ორი – სელიმ ხიმშიაშვილისა და მერაბ კოსტავას სკულპტურა დაიდგმება. ქანდაკებების ესკიზებზე კონკურსი გასულ წელს სამჯერ გამოცხადდა. გარდა აღნიშნული ორი კონკურსისა, მერიას კიდევ ხუთ ნამუშევარზე ჰქონდა კონკურსი გამოცხადებული, თუმცა კომისიამ ვერც ერთ მათგანში გამარჯვებული ვერ გამოავლინა.  

 

სელიმ ხიმშიაშვილისა და მერაბ კოსტავას ქანდაკებების ესკიზების გარდა კონკურსი გამოცხადებული იყო ცხრა აპრილის, გმირთა მემორიალის, ტბელ აბუსერიძის, ეგნატე ნინოშვილისა და ჟიული შარტავას ქანდაკებების ესკიზებზე, თუმცა საკონკურსო კომისიამ გამარჯვებული, არაერთი მცდელობის მიუხედავად, ვერ გამოავლინა.

 

„ჩვენ მხოლოდ ორი ნიმუში შევარჩიეთ, – სელიმ ხიმშიაშვილისა და მერაბ კოსტავასი. დანარჩენი ნიმუშები არ შეესაბამებოდა საკონკურსო პირობებს“, – განაცხადა „ბათუმელებთან“ მერიის განათლებისა და კულტურის განყოფილების უფროსმა ლამზირა ბოლქვაძემ.

 

სელიმ ხიმშიაშვილის ქანდაკების ესკიზის ავტორი მოქანდაკე დავით ბოლქვაძეა, მერაბ კოსტავას ქანდაკების ესკიზი კიმ გენო ზაქარაიას ეკუთვნის.
სელიმ ხიმშიაშვილის ქანდაკება ბრინჯაოშია გადაწყვეტილი, მერაბ კოსტავასი – თეთრი მარმარილოსგან დამზადდება.

 

სელიმ ხიმშიაშვილის ქანდაკების ესკიზის ბიუჯეტი ხუთი ათასი ლარია, მერაბ კოსტავას ქანდაკების ესკიზის – ოთხი ათასი ლარი.
დარჩენილი ხუთი ქანდაკების ესკიზზე კონკურსებს ბათუმის კეთილმოწყობის სამსახური წელს ხელმეორედ გამოაცხადებს.

 

როგორც სამსახურის უფროსი თენგიზ პეტრიძე ამბობს, საკონკურსო დოკუმენტაცია ქანდაკების ნიმუშების გამოსავლენად თავიდან უნდა შეიქმნას:
„საკონკურსო დოკუმენტაცია გამზადებულია და კომისიაში მოწვეულნი არიან ხელოვნების დარგის სპეციალისტები, არქიტექტორები. როცა კომისია ბრძანებით დამტკიცდება, კონკურსიც ოფიციალურად გამოცხადდება“.

 

ქანდაკებების დადგმაზე ბიუჯეტი გამარჯვებული ნიმუშების გამოვლენის შემთხვევაში დამტკიცდება.

 

ნეტგაზეთის მასალების სხვა გამოცემებში გადაბეჭდვის წესი
ლელა დუმბაძე