Batumelebi | ითხოვე პატიება ითხოვე პატიება – Batumelebi
RU | GE  

ითხოვე პატიება

 

ჟურნალისტ ჯაბა ანანიძის გარშემო განვითარებულ მოვლენებს მინდა გამოვეხმაურო. ჯაბას ფილმში, რის გამოც მას დეპუტატი მედეა ვასაძე თავს დაესახა, ჩემი კომენტარიც არის ჩასმული – ვამბობ, რომ უმაღლესი საბჭოდან უკანონოდ გამათავისუფლეს. ფილმის გასვლის შემდეგ მედეა ვასაძემ „ტვ 4“-ის ეთერში ტყუილი თქვა, თითქოს მე სამსახურიდან იმისთვის გამიშვეს, რომ ხელშეკრულების ვადა ამომეწურა. სინამდვილეში სამთვიანი ხელშეკრულება უმაღლესმა საბჭომ გამიფორმა 2013 წლის 4 იანვარს და მოწვეულ სპეციალისტად მუშაობის უფლება მქონდა 31 მარტამდე. სამსახურიდან კი, რამაზ ბოლქვაძის ბრძანებით, 18 თებერვალს გამაგდეს. მიზეზი მითხრა კიდეც დეპუტატმა ალექსანდრე ჩიტიშვილმა: „ჩვენი წინააღმდეგი ხარ“.

 

სინამდვილეში მე ვარ „ქართული ოცნების“ დამფუძნებელი იმ 60 ადამიანთან ერთად, ვინც აჭარიდან ხელი მოაწერა პარტიის დაფუძნებას…

 

 

მერე კიდევ ერთ „დოკუმენტს“ მოვაწერე ხელი წაკითხვის გარეშე – წერილს ბიძინა ივანიშვილისადმი, რომელშიც საუბარი იყო მურმან დუმბაძესთან, ავთანდილ ბერიძესთან, მედეა ვასაძესა და ალექსანდრე ჩიტიშვილთან დაკავშირებულ ნეპოტიზმზე.

 

 

ამ წერილის „ხელმოწერას“ წინ უსწრებდა დეპუტატ ჯუმბერ კობალაძისა და ბიჭიკო ბოლქვაძის ზარი ჩემს ტელეფონზე, ცხაკაიას ქუჩაზე თბილისის „ქართული ოცნების“ პოლიტსაბჭოს მიერ აჭარაში მოვლენილი თამაზ თურმანიძის გასაცნობად მიმიწვიეს… რადგან უმაღლეს საბჭოში ფაქტობრივად არაფერს ვაკეთებდი და სულ ოთხჯერ ვიყავი მისული (მითხრეს, როცა დაგვჭირდები, დაგიძახებთო), „ოცნების“ კონფერენციის მომზადებაში ჩავერთე. მთხოვეს პარტიაში მისაღები კანდიდატებისთვის რეკომენდაციები გამეკეთებინა.

 

 

აი, სწორედ კონფერენციის დღეს მოვაწერე წერილს ხელი, რომელიც ასე იწყებოდა: `ბატონო ბიძინა, პარტიის „ქართული ოცნება დემოკრატიული საქართველოს“ ბათუმელ დამფუძნებელთა უმეტესობა გიდასტურებთ რა პატივისცემას, ვუცხადებთ ნდობას პოლიტსაბჭოს მიერ წარმოდგენილ საქალაქო ორგანიზაციის თავმჯდომარის პოსტზე თამაზ თურმანიძის კანდიდატურას. ჩვენ მივესალმებით პოლიტსაბჭოს გადაწყვეტილებას, ვინაიდან ვთვლით, რომ ქვეყნის წარმატების მთავარ ფაქტორს წარმოადგენს საქართველოში იმ პოლიტელიტის არსებობა, ვისაც სიბრძნე, პატრიოტიზმი, კანონმორჩილება, სამართლიანობის სიყვარული არ აძლევს უფლებას მიემხროს ვიწრო ჯგუფურ ინტერესებს“…

 

 

აი აქ შევწყვიტე კითხვა…  

 

 

სხვათა შორის, იმ წერილს მაშინ, ასევე წაკითხვის გარეშე მოაწერა ხელი ავთანდილ დიასამიძემაც, რომელიც ახლა შუახევის გამგებლის მოადგილეა. სკანდალის ატეხის შემდეგ მე და ავთანდილ დიასამიძეს შემოგვთავაზეს – ბრიფინგი გამართეთ და თქვით, „შეცდომაში შეგვიყვანესო“. ავთანდილ დიასამიძემ პატიება ითხოვა და დააწინაურეს…

 

 

სიმართლე უნდა ვთქვა, მაშინ წერილი ბოლომდე რომ წამეკითხა, ხელს ნამდვილად არ მოვაწერდი, მაგრამ წერილის შინაარს მაშინაც ვეთანხმებოდი და ახლაც, ამიტომაც აღარ გავმართე ბრიფინგი პატიების თხოვნით…

 

 

მე გამაგდეს, გავჩუმდი და სახლში ვზივარ შემოსავლის გარეშე, მაგრამ მედეა ვასაძის მხრიდან ჯაბა ანანიძეზე თავდასხმის შემდეგ მაინც მომინდა ხმამაღლა დავსვა კითხვა _ როდემდე შეიძლება ამ ქალბატონისა და მისი მეგობრების გამო ასე ვისჯებოდეთ. რატომ აქვს უფლება, კანონი მხოლოდ მან მოირგოს?!

 

 

თამაზ თურმანიძეზე კი მხოლოდ ერთ წინადადებას ვიტყვი, მას უმაღლეს საბჭოში გაურკვეველი წარმომავლობის პოლიტიკოსს ეძახდნენ. მერე იმდენი მოახერხეს, რომ საარჩევნო სიებიც ერთად შეადგინეს მან და მურმან დუმბაძემ და რაიონებში ხალხსაც თავიანთი შეხედულებით ნიშნავენ თუ ხსნიან.

 

მე შეხვედრა ვერც თამაზ თურმანიძესთან მოვახერხე.

ნეტგაზეთის მასალების სხვა გამოცემებში გადაბეჭდვის წესი
მოსაზრება , გულიკო გაბაიძე