ჩვენს ცენტრში ყველას თავისი თემა აქვს არჩეული და მის ირგვლივ მუშაობს, ვაგროვებთ ინფორმაციას და შემდეგ თანატოლებთან ტრენინგებს ვატარებთ.
იცით რა მარტივია, როდესაც შენი თანატოლი გიზიარებს ინფორმაციას კონკრეტულ საკითხზე, ასე ყველაფერი უფრო ადვილი გასაგები ხდება!
ჩვენს ცენტრში ყველა ერთმანეთის მეგობრები ვართ. ხშირად ვიკრიბებით არასამუშაო შეხვედრებზე, მიზეზი კი ერთია – ერთმანეთის ნახვა და ერთად დროის გატარება.
ჩვენს ცენტრს ყველაზე მაგარი კოორდინატორი და ხელმძღვანელი ჰყავს! ადამიანები, რომლებიც, პირველ რიგში, ჩვენი დიდი მეგობრები არიან.
ჩვენს ცენტრში სიყვარულის, მეგობრობისა და შრომის ჰარმონიული გარემოა!
ტრენინგის ჩატარება ჩემი დიდი ხნის ოცნება იყო, რაც ძალიან მალე ამიხდა.
ახლახანს ვიყავი გორში, თანატოლთა გაცვლითი პროგრამის ფარგლებში ჩავატარე ტრენინგი რასიზმზე. რასიზმი ჩემ მიერ შერჩეული თემაა, რის ირგვლივაც მე და ჩემი მეგობარი ერთად ვმუშაობთ და ვაგროვებთ ინფორმაციას.
თემაზე მუშაობისას აღმოვაჩინე, რომ თურმე აქამდე რასისტი ვყოფილვარ. ჩემდა უნებურად, გაუთვიცნობიერებლად მეშინოდა, მაგალითად, თურქების, შავკანიანებს ვეძახდი „ზანგებს“ ისე, რომ არც კი ვიცოდი, რა შეიძლება გამოეწვია ჩემს ასეთ საქციელს.
სწორედ მუშაობის პროცესში შემეცვალა დამოკიდებულება. გავმიჯნე სწორი და არასწორი და დავადექი გზას, რომელმაც ჩამომიყალიბა ცხოვრების სწორი სტილი.
იცით რა სასიამოვნოა, როდესაც გრძნობ, რომ შენს ელემენტარულ ინიციატივასა თუ აქტივობას შეიძლება დიდი შედეგი მოჰყვეს. აი, ახლა კი თავს აშკარად უფრო მეტად ამაყად ვგრძნობ!
ახლა თითქმის ყველა თემაზე ვფლობ ცოტაოდენ ინფორმაციას მაინც. ვგრძნობ, რომ სულიერად თითქოსდა გავიზარდე და ჩემში გაიღვიძა სხვა, უფრო აქტიურმა ლელამ!
ხშირად ვიხსენებ და ვფიქრობ როგორი იყო ჩემი ცხოვრება მანამდე? ალბათ მონოტონური, უინტერესო და შავ-თეთრი. არ მამოძრავებდა რაიმე კონკრეტული მიზანი. ადრე არ შემეძლო საზოგადოებში ხმის ამოღება, ალბათ იმიტომ, რომ არ ვფლობდი საკმარის ინფორმაციას და მეშინოდა. თითქოსდა რაღაც მაბრკოლებდა.
როგორი ვარ დღეს? 180 გრადუსით შემობრუნებული და ბედნიერი. დღეს თამამად შემიძლია ხმის ამოღება ნებისმიერ საზოგადოებაში და არ ვუშინდები არანაირ დაბრკოლებას.
დღეს გამუდმებით ვსვამ კითხვებს: „რა“? „რატომ?“ „როგორ“? `საიდან“? „როდის“?… შევიძინე ახალი, საინტერესო მეგობრები, რამაც ჩემს ცხოვრებას ცისარტყელას ფერები შესძინა.
მე ვარ ბედნიერი, მე ვარ ამაყი, მე ვარ აქტიური მოქალაქე, მაშასადამე მე ვარ ბათუმის ახალგაზრდული ცენტრის წევრი!
