Batumelebi | მანდარინები მანდარინები – Batumelebi
RU | GE  

მანდარინები

 

 

სხვანაირია მამაჩემი, მანდარინობის დროს როცა მირეკავს. ტრადიციად იქცა: ამ დროს უიმედობა ემართება. აინტერესებს, ხომ არ ვიცი იმაზე უფრო მეტი, ვიდრე ჩემი გადაცემის სტუმრები ეთერში ამბობენ. არ სჯერა, რომ კამერებს მიღმაც ქართველი ჩინოვნიკების დიდი ნაწილი ხშირად ინარჩუნებს იმ როლს, რასაც პირდაპირ ეთერში ცდილობს, რომ ითამაშოს. სტუმრები ირწმუნებიან, რომ ყველაფერი გენიალურადაა. ასე ამბობენ იმის მიუხედავად, რომ მანდარინის მსურველი არ ჩანს. მამაჩემს არ სჯერა ჩემი სტუმრების, რადგან ბევრჯერ მოუსმენია მანდარინის სიყვითლესავით მკვეთრი დაპირებები, შემდეგ კი – მასაც მდინარისთვის გაუტანებია მანდარინი… 

„ხომ შეიძლება თავისი ნებით გადაყაროს გლეხმა მანდარინი?“  –  ეს მურმან დუმბაძემ მკითხა გადაცემაში. მანამდე მე ვკითხე, აპირებდა თუ არა პოლიტიკის დატოვებას, თუკი ციტრუსის სეზონი ჩავარდება? საპრეზიდენტო არჩევნებამდე ორი დღით ადრე მურმან დუმბაძემ „დიალოგში“  თქვა: „თუკი წელს მეციტრუსე თუნდაც ერთ კაკალ მანდარინს გადააგდებს, პოლიტიკას დავტოვებ“.

ჰოდა, თუკი გლეხობას კარგ ფასს სთავაზობენ, მაგრამ ისინი მანდარინს მდინარეში ყრიან, მურმან დუმბაძემ პოლიტიკა რატომ უნდა დატოვოს? ან თუკი მეციტრუსეები ჭაჭას სვამენ და საქმეს არ აკეთებენ, მინისტრი ზაურ ფუტკარაძე რა შუაშია? მერე რა, რომ ციტრუსის სეზონის დაწყებამდე მინისტრი განბაჟების შემცირებულ ტარიფებზე საუბრობდა, ექსპორტიორები კი საუბრობენ იმაზე, რომ განბაჟებაში არაფერი შეცვლილა.

მერე რა, რომ დაპირებული გემი რახანია მოდის…

როდის ან რაში სჭირდებათ პოლიტიკოსებს ილუზიის შექმნა? ვინ შეიძლება დააჯერო, მაგალითად, როცა ირწმუნები: ციტრუსი იყიდება, ყველაფერი გენიალურადაა, მაგრამ „მეციტრუსე ციტრუსს წყალს ატანს“? „მეციტრუსეები ჭაჭას სვამენ და უმჯობესია ხარისხიანი ციტრუსის მოყვანაზე იზრუნონ“, ან კიდევ: „გადაცემაში ერთი წლის განმავლობაში ვერ გესტუმრეთ იმიტომ, რომ მოუცლელი ვარ და ძალიან ვიღლები“; (ეს ბოლო პასუხი ავთანდილ ბერიძეს ეკუთვნის).

ილუზია ალბათ მაშინაა „საჭირო“, როცა პოლიტიკოსს სჯერა, რომ რაც უნდა მოხდეს, სისუსტე არ უნდა აჩვენოს ვინმეს. პირიქით, უნდა დაანახოს ყველას, რომ უკან არ იხევს, სათავეში დგას, ძლევამოსილია, აღმატებულია, კი არ დაიქირავა ხალხმა, არამედ თავად მას ემორჩილებიან და ხალხს, რასაც უნდა იმას ეტყვის.

გეტყვის, რომ „მოგზავნილი ხარ“, „ჩაწყობილი ზარია“, „მითხარით სახელი და გვარი, სად ცხოვრობთ?“  – ამ ფრაზებით „უტევდა“ მურმან დუმბაძე მაყურებელს, ვინც სეზონის პრობლემებზე სვამდა შეკითხვებს.

მხოლოდ მაყურებელს არა, ჟურნალისტებსაც წამოგვიყენა პრეტენზია იმ საღამოს მურმან დუმბაძემ. გვითხრა, რომ „ვაწყობთ ზარებს“და `შეგნებულად ვარჩევთ კრიტიკულ ზარებს“.

მერე რა, რომ ამას ვერ ადასტურებს პარლამენტის ვიცე-სპიკერი? მერე რა, რომ მაყურებელი ზედიზედ რეკავს და ერთსა და იმავეს ამბობს?

ეს ჟურნალისტები ამუქებენ სურათს, არ ასვენებენ მანდარინებს, თორემ არაფერი უჭირს მეციტრუსეს…

ჭაჭას სვამს და გაბრუებული დადის.

ნეტგაზეთის მასალების სხვა გამოცემებში გადაბეჭდვის წესი
ჯაბა ანანიძე