ბარცხანის დასახლებაში მინიმოედანი აშენდება

 შემსყიდველმა სპორტული მინი-მოედნის მოწყობის სამუშაოები ბათუმის მერიასთან ხელშეკრულების გაფორმებიდან 90 დღის განმვალობაში უნდა შეასრულოს.

სატენდერო დოკუმენტაციის მიხედვით, მშენებლობაში გამოყენებული ყველა მასალა უნდა იყოს მაღალი ხარისხის და აკმაყოფილებდეს საქართველოში მოქმედ ყველა სამშენებლო ნორმასა და სტანდარტს. სამუშაოების შემსრულებელმა უნდა უზრუნველყოს უსაფრთხოება, რათა შეძლებისდაგვარად აიცილოს უბედური შემთხვევები და მინიმუმამდე დაიყვანოს თავისი მუშაკების და სხვა ადამიანთა ზარალი. სამუშაო ტერიტორიაზე უნდა იყოს შესაბამისი ნიშნები და გაფრთხილებები.

სატენდერო დოკუმენტაციის მიხედვით, მოედნის ხელოვნური საფარი შემდეგ მონაცემებს უნდა შეესაბამებოდეს:

• · ბუსუსების სიმაღლე – მინ. 25 მმ;
• · გაკერვა – 3/8;
• · ყულფის რაოდენობა – 16 (10) სმ;
• · ბუსუსების სიმკრივე – 17850 ყულფი/კვმ;
• · ბუსუსების წონა – 1200 გრ/კვმ (+ – % 5);
• · მთლიანი წონა – 2290 გრ/კვმ;
• · საფუძველი – ბეტონი;
• · რულონის სიგანე – 410 სმ (+ – % 2);
• · გამძლე ძაფი – მონოფილამენტი;
• · ბუსუსების გამძლეობა – % 8600-9500;
• · ბუსუსების ჭრილი – 12 მმ, 100 მიკრონი.

რატომ შეირჩა ხელოვნური საფარისთვის კონკრეტულად ეს მონაცემები? ბათუმის მერიის კეთილმოწყობის სამსახურში განმარტავენ, რომ ეს მონაცემები უკეთესი ხარისხისაა და შეესაბამება „ფიფას“ სტანდარტებს.

ტენდერში მონაწილე კომპანიას უკანასკნელი 3 წლის განმავლობაში (2012, 2013, 2014) და 2015 წლის 1 მაისამდე შესრულებული უნდა ჰქონდეს სპორტული მოედნების მშენებლობის ანალოგიური ხასიათის, სირთულისა და შინაარსის სამუშაოები – საერთო ღირებულებით არანაკლებ 150 000 ლარისა.

ტენდერში წინადადების წარდგენა 13 მაისს იწყება და 18 მაისს მთავრდება.