Batumelebi | შავფაროსნები – დაცემა სიკვდილის ტოლფასია შავფაროსნები – დაცემა სიკვდილის ტოლფასია – Batumelebi
RU | GE  

შავფაროსნები – დაცემა სიკვდილის ტოლფასია


ქართული საბრძოლო ხელოვნება ქართული კულტურის ერთ-ერთი ძირძველი და განუყოფელი ნაწილია, რომელიც მსოფლიოს სხვა საბრძოლო ხელოვნებებისგან გამოირჩევა. თითქმის მივიწყებულის აღდგენა გასული საუკუნის 90-იან წლებში დაიწყო თბილისში, კახა ზარნაძისა და ლაშა კობახიძის თაოსნობით და პირველი ორგანიზაცია სწორედ მაშინ შეიქმნა. 2007 წლიდან კი „კავშირი ქართული საბრძოლო ხელოვნება“ ბათუმშიც შეიქმნა, თუმცა მას დღეს უკვე ქართული საბრძოლო ხელოვნება – „შავფაროსნების“ აჭარის ფედერაცია ეწოდება, რომელიც გოჩა გოგიბერიძისა (პრეზიდენტი) და ზვიად ჯაფარიძის (მთავარი მწვრთნელი) ერთობლივი ძალისხმევით ჩამოყალიბდა. ბათუმელები ზვიად ჯაფარიძეს ესაუბრა.

 

ირაკლი დარცმელიძე

– 2007 წელს დავაფუძნეთ ჩვენი კავშირი, 2008 წლიდან კი უკვე სისტემატურად ვმონაწილეობთ სხვადასხვა შეჯიბრებებში. ამჯერად კი „შავფაროსნებად“ ვიწოდებით. ქართული საბრძოლო ხელოვნების სხვადასხვა სახეა ცნობილი, ეგ არი კრივი, ჭიდაობა, ფარიკაობა და ასე შემდეგ. საქართველოს ყველა კუთხეს თავისთვის დამახასიათებელი სტილი აქვს. ამ ეტაპზე ჩვენთან ძირითადად ჭიდაობის სახეობაში, კრივსა და შერეულ კრივში ვავარჯიშებთ. სამწუხაროდ, სათანადო იარაღი არ გვაქვს რომ წვრთნა ამ მიმართულებითაც გავაგრძელოთ, თუმცა ბათუმის მერია დაგვპირდა, რომ საჭირო აღჭურვილობას შეგვიძენდა. რაც შეეხება შერეულ კრივს, ეგ არი ჭიდაობისა და კრივის სინთეზი, საიდანაც ამოვიღეთ გარკვეული  ილეთები და ეს უპირველესად ბავშვებისათვის გავაკეთეთ, რათა ნაკლებტრამვიანი ყოფილიყო. ამ ეტაპზე ჩვენთან 50-მდე მსურველი ვარჯიშობს, აქედან 30 კი შეჯიბრებებშიც მონაწილეობს და გარკვეული შედეგებიც გვაქვს.

 

– კონკრეტულად რას ემსახურება თქვენი საქმიანობა?

– ქართული საბრძოლო ხელოვნება, როგორც მოგეხსენებათ, ქართული კულტურის განუყოფელი ნაწილია. ერთგვარი ტრადიციაც კია და ჩვენ ამ უძველესი და თითქმის მივიწყებული ტრადიციების აღდგენას ვცდილობთ. გვინდა მომავალ თაობაში ქართული სული განვამტკიცოთ და გავაცნოთ ხალხს ქართული საბრძოლო ხელოვნება. ოქტომბერ-ნოემბერში ვატარებთ საქართველოს ღია ჩემპიონატს, რომელშიც საქართველოს ყველა კუთხის წარმომადგენელი მიიღებს მონაწილეობას. გვყავს ერთი მებრძოლი, ილო ქათამაძე, რომელიც არტ-გენის ფესტივალზე მიიწვიეს და `შავფაროსნებთან~ ერთად მართავს საჩვენებელ გამოსვლებს.

 

– „შავფაროსნები“ ხშირად მართავენ თეატრალიზირებულ წარმოდგენებს… ახლახან რომშიც იყვნენ მიწვეულნი, სადაც მსოფლიოს საბრძოლო ხელოვნებათა ფესტივალზე მიიღებს მონაწილეობა…

– დიახ და ძალიან კარგი შთაბეჭდილებაც დატოვეს. რაც შეეხება თეატრალურ დადგმებს, მასეთი წარმოდგენების გამართვა ჩვენს შეგვიძლია, ეგაა ჯერ სათანადო იარაღები არ გვაქვს, თუმცა, როგორც უკვე გითხარით, დახმარებას დაგვპირდნენ და უახლოს მომავალში ალბათ მივიღებთ დაპირებულს.

 

–  რა იარაღს ანიჭებთ უპირატესობას?

– პირველ რიგში ტრადიციულად ხმალი და ფარი, აგრეთვე შუბი, ნაჯახი, კოლხური ხელცულები, სატევარი, მათრახი, შურდული, ტაბარი (ორპირა ნაჯახი), ღაჯია (სათითე)…

 

– ყველა კუთხეს თავისთვის დამახასიათებელი სტილი აქვს, აჭარა თუ გამოირჩევა ამ მხრივ და რითი?!

– აღნიშნული საკითხის შესასწავლად ჩვენი კავშირის წევრები საქართველოს მასშტაბით ხშირად მართავენ ექსპედიციებს. ჩვენ მხოლოდ ერთი ექსპედიცია გვქონდა სარფში და იქ შევხვდი ერთ პიროვნებას, სამწუხაროდ სახელი და გვარი არ მახსოვს, რომელმაც აგვიხსნა, რომ უძველესი დროიდან იარაღის საკმაოდ გავრცელებული სახეობა იყო შურდული. დარწმუნებული ვარ, აჭარა საკმაოდ მდიდარი იქნება საბრძოლო ხელოვნებათა ტრადიციებით, მაგრამ ამის გამოსაკვლევად, როგორც აღვნიშნეთ ექსპედიციების მოწყობაა საჭირო, ეს კი თანხებთანაა დაკავშირებული, რომლის სიმცირესაც განვიცდით.

 

– ტურნირებს გიფინანსებენ თუ საკუთარი ხარჯებით დადიხართ?

– სპორტის დეპარტამენტის კალენდარულ გეგმაში 2 ტურნირი გვაქვს დაფინანსებული, ერთი აჭარის შიდა და ერთიც ღია პირველობა. დანარჩენზე კი საკუთარი ხარჯებით დავდივართ.

 

– ის სპორტსმენები, რომლებიც თქვენთან ვარჯიშობენ, სხვა სახეობებში გამართულ შეჯიბრებებში თუ ღებულობენ მონაწილეობას?

– რა თქმა უნდა. ჩვენ შეგვიძლია ნებისმიერ სახეობაში გავიყვანოთ ჩვენი მებრძოლი, კარატე, კიკ-ბოქსინგი და ასე შემდეგ. პირადად მე შარშან მსოფლიო ჩემპიონატის პრიზიორი გავხდი კონტაქტურ კარატეში. ჩვენთან აპრობირებულია აგრეთვე ე.წ. ქალაქური კრივი. რომელიც ჭიდაობისა და კრივის ნაზავს წარმოადგენს და ერთი მთავარი წესი  მოქმედებს – ბრძოლა მაშინ წყდება, როდესაც ერთ-ერთი მეტოქე დაეცემა ანუ დაცემა სიკვდილის ტოლფასია.18 წლის ზემოთ ნებისმიერ მსურველს შეუძლია მონაწილეობის მიღება და არც წონით კატეგორიაშია შეზღუდვა. ანალოგიურ ტურნირში მივიღე შარშან მონაწილეობა. ფინალში გავედი, იქ კი ყაზბეგელ გიორგი საბაურთან დავმარცხდი.

 

– ვიცი რომ „შავფაროსნები“ იარაღს თავად ამზადებენ…

– დიახ. უმეტესწილად ყველა ორგანიზაციას საკუთარი სამჭედლო აქვს და იარაღსაც თავად ამზადებენ. იმედია, მალე ჩვენს გვექნება ჩვენი სახელოსნო, სადაც შევძლებთ სხვადასხვა იარაღის დამზადებას. გეგმაში გვაქვს საკუთარი თეატრის გაკეთებაც და შემდეგ ჩვენი ვარჯიშებიც გაცილებით საინტერესო და სანახაობრივადაც დატვირთული იქნება.

ნეტგაზეთის მასალების სხვა გამოცემებში გადაბეჭდვის წესი
ირაკლი დარცმელიძე