„სასამართლომ მზია ამაღლობელს – ცნობილ ჟურნალისტს, დამოუკიდებელი გაზეთის, „ბათუმელების“, ონლაინგამოცემა „ნეტგაზეთის“ დამფუძნებელს, ორწლიანი პატიმრობა მიუსაჯა „სახელმწიფო მოხელის წინააღმდეგობის, მუქარის ან ძალადობის“ პოლიტიკურად მოტივირებული ბრალდებით. საერთაშორისო ორგანიზაციებმა და დიპლომატიურმა მისიებმა დაგმეს გამამტყუნებელი განაჩენი, როგორც „პოლიტიზებული და არაპროპორციული“, – აღნიშნულია Human Rights Watch-ის ახალ ანგარიშში „მსოფლიოს ანგარიში 2026“.
HRW-ის ახალ ანგარიშში მზია ამაღლობელის საქმე მოხვდა გამოხატვისა და მედიის თავისუფლების კუთხით საქართველოში შეცვლილი ვითარების ნაწილში. ანგარიში 2026 წლის 3 თებერვალს გამოქვეყნდა.
მზია ამაღლობელი გამოცემა „ბათუმელებისა“ და „ნეტგაზეთის“ დამფუძნებელი და თანადირექტორია. ის უკვე 1 წელზე მეტია რჩება უკანონო პატიმრობაში.
2025 წლის 16 დეკემბერს პატიმრობაში მყოფ ჟურნალისტსა და მედიამენეჯერს, მზია ამაღლობელს, სტრასბურგში, ევროპარლამენტში, ევროკავშირის ადამიანის უფლებათა უმაღლესი ჯილდო, სახაროვის პრემია გადასცეს.
მზია ამაღლობელის საჩივრის განხილვა უკვე დაიწყო სტრასბურგის სასამართლომ.
კიდევ რა წერიაHuman Rights Watch-ის ახალ ანგარიშში საქართველოში მედიისა და ადამიანის უფლებების დაცვის კუთხით?
„კიდევ ერთმა საკანონმდებლო ცვლილებებმა შეზღუდა მედიის მდგომარეობა: ცვლილებებით მტკიცების ტვირთი გადადის ბრალდებულზე, ამოღებულია პრეზუმფცია სიტყვის თავისუფლების სასარგებლოდ, გაუქმებულია წყაროს დაცვა, შეზღუდულია საზოგადოებრივი ინტერესების გამონაკლისები და იზრდება ცილისწამებისთვის პასუხისმგებლობა. ბრალდებულებს, მათ შორის, ჟურნალისტებს, მოეთხოვებათ თავიანთი განცხადებების სიმართლის დამტკიცება და არა – მოსარჩელეებს.
2025 წლის აპრილში პარლამენტმა მიიღო ცვლილებები „მაუწყებლობის შესახებ“ კანონში, რომლითაც აიკრძალა მაუწყებლობისთვის უცხოური დაფინანსება და ნატურით დახმარება და გაფართოვდა კომუნიკაციების კომისიის, მმართველი პარტიის მიერ დანიშნული ორგანოს, უფლებამოსილება, რათა დაარეგულიროს მაუწყებლების კონტენტი.
2025 წლის ივნისში მმართველმა პარტიამ კომუნიკაციების კომისიაში შეიტანა საჩივარი ორი ძირითადი ოპოზიციურად განწყობილი არხის: „ფორმულას“ და „TV პირველის“ წინააღმდეგ – სხვა საკითხებთან ერთად, მთავრობის ლეგიტიმურობის კითხვის ნიშნის ქვეშ დაყენების გამო მათ რეპორტაჟებში. საჩივარი ეჭვქვეშ აყენებს ისეთი ტერმინების გამოყენებას, როგორიცაა „არალეგიტიმური მთავრობა“, „რეჟიმი“ და „სახელმწიფოს ხელში ჩაგდება“.
კომისიას აქვს სანქციების დაკისრების უფლებამოსილება, დაწყებული გაფრთხილებითა და მაკორექტირებელი ქმედებებით, დამთავრებული მაუწყებლობის ლიცენზიის შეჩერებით ან გაუქმებით,“ – ვკითხულობთ HRW-ის ახალ ანგარიშში.
ანგარიშში საუბარია სხვადასხვა უფლების დაცვის კუთხით დამძიმებული მდგომარეობის შესახებ, მათ შორის, პოლიტიკური ლიდერების პატიმრობის შესახებ:
„საქართველოში ადამიანის უფლებების მდგომარეობა მკვეთრად გაუარესდა 2025 წელს, როდესაც „ქართულმა ოცნებამ“ მიიღო ფართომასშტაბიანი კანონები, რომლებიც მიზნად ისახავდა აქტიური სამოქალაქო საზოგადოების განადგურებას და კრიტიკული მედიის გაჩუმებას.
ხელისუფლება ასევე გადაჭარბებულად ჩაერია ძირითადად მშვიდობიან საპროტესტო აქციებში. ეს ზომები ეწინააღმდეგება საქართველოს მიერ ადამიანის უფლებების დაცვის ვალდებულებებს გამოხატვის, შეკრებისა და გაერთიანების თავისუფლებების, ასევე თანასწორობისა და დისკრიმინაციის აკრძალვის შესახებ.
2025 წლის მარტში მიღებული ახალი კანონმდებლობა „უცხოელი აგენტების“ შესახებ მოითხოვს, რომ ორგანიზაციები და ფიზიკური პირები დარეგისტრირდნენ სახელმწიფო რეესტრში და აკისრებს მძიმე ანგარიშგების ვალდებულებებს სისხლისსამართლებრივი დევნის საფრთხის ქვეშ. სხვა რეპრესიული ცვლილებები მოითხოვს მთავრობის თანხმობას ყველა უცხოური გრანტისთვის და კიდევ უფრო ზღუდავს მშვიდობიან საპროტესტო აქციებს, დამოუკიდებელ მედიას და სიტყვის თავისუფლებას,“ – აღნიშნულია HRW-ის ანგარიშში.
ამ თემაზე:
საქართველოში ხელისუფლებისგან განსხვავებული აზრის ქონა სულ უფრო საშიში ხდება — HRW
