ჟურნალისტისა და მედიამენეჯერის, მზია ამაღლობელის ადვოკატი მაია მწარიაშვილი ამბობს, რომ „ოცნების“ პრემიერის, ირაკლი კობახიძის განცხადებებთან დაკავშირებით, რომლითაც კობახიძე მზია ამაღლობელის უდანაშაულობის პრეზუმფციას ლახავს, სასამართლოს მიმართავენ.
ამის შესახებ მაია მწარიაშვილმა „ტვ პირველის“ ეთერში განაცხადა დღეს, 2 მაისს.
„ეს განცხადებები, გარდა იმისა, რომ ცილისმწამებლურია, ასევე უხეშად არღვევს მზიას უდანაშაულობის პრეზუმფციას.
ჩვენ ამ ცილისმწამებლურ და მისი უფლებების შემლახველ განცხადებებთან დაკავშირებით მივმართავთ სასამართლოს.
არ ვფიქრობდით მიგვემართა ქართული სასამართლოსთვის, ისედაც ვდავობთ სტრასბურგში უკვე გაგზავნილი სარჩელით, მაგრამ მაინც მივმართავთ ქართულ სასამართლოს, სწორედ იმიტომ, რომ ამავე სასამართლოს ვაიძულოთ იმსჯელოს ამ საკითხებზე.
ეს სასამართლოც უნდა ვაიძულოთ, თვითონ თქვან, ასეთი განცხადებები არის თუ არა მზიას უდანაშაულობის პრეზუმფციის დამრღვეველი განცხადებები, ცილისმწამებლური განცხადებები. თუ იტყვიან, რომ ეს ასეთი არ არის, რა საკვირველია, ამ საქმესაც წავიღებთ სტრასბურგში“ – განაცხადა მაია მწარიაშვილმა.
16 აპრილს, ტელეკომპანია „რუსთავი 2“-ის ეთერში კობახიძემ მზია ამაღლობელზე თქვა, რომ თითქოს მან ვიღაცის დავალებით მიაყენა პოლიციელს შეურაცხყოფა. ეს არ იყო პირველი შემთხვევა, როცა კობახიძემ მზია ამაღლობელის საქმეზე ცილისმწამებლური განცხადება გაავრცელა. მსგავსი განცხადებები გაავრცელეს „ოცნების“ სხვა წევრებმაც.
ამავე თემაზე:
ირაკლი კობახიძე არღვევს მზია ამაღლობელის უდანაშაულობის პრეზუმფციას – ადვოკატი
