ონლაინგამოცემა „აჭარა თაიმსის“ დამფუძნებელმა და დირექტორმა, ჟურნალისტმა სულხან მესხიძემ სპეციალურ საგამოძიებო სამსახურს მიმართა მასზე განხორციელებული თავდასხმის შემთხვევების გამოძიების მოთხოვნით.
ჟურნალისტი ამბობს, რომ მასზე თავდასხმის ერთი შემთხვევა მოხდა „ოცნების ქალაქში“, 15 თებერვალს, როცა ის დასახლებაში ორი ბავშვის ტრაგიკულ დაღუპვას აშუქებდა ფეისბუქზე პირდაპირი ჩართვით.
„გაშუქების პროცესში ადგილობრივი მოსახლეობა გამოირჩეოდა აგრესიულობით, რასაც ადასტურებს ჩემ მიერ გადაღებული არაერთი კადრი. მაგალითად, ერთ-ერთ ვიდეოში დანიელ თურაძე, რომელიც გახლავთ ბათუმის ბულვარის თანამშრომელი, ხელის დარტყმით ძირს აგდებს „აჭარა თაიმსის“ ტექნიკას – ისვრის მიკროფონს და მანამდე მეუბნება შემდეგ ფრაზებს : „ … ეს გახარებთ თქვენ და ამიტომ აკეთებთ ამას. სიხარულისთვის აკეთებთ ამას, გაჭირვებისთვის ამას არ აკეთებთ.“ ვიდეოში ისმის ასევე რეპლიკა: „უნამუსო კაცი“.
დროის ამ მონაკვეთში, იმავე ტერიტორიაზე ჩაიარეს ჩინოვნიკებმა (ირაკლი თავდგირიძე, ბათუმის საკრებულოს თავმჯდომარე, მინდია გოგუაძე, საკრებულოს წევრი, რამაზ ჯინჭარაძე, უმაღლესი საბჭოს დეპუტატი და სხვა.) და მათ არანაირი რეაქცია არ ჰქონიათ ამ ფაქტზე. ფაქტობრივად, დუმილით მხარი დაუჭირეს დანიელ თურაძის ამ მოქმედებას და ჟურნალისტური საქმიანობის ხელშეშლას. სწორედ ამ დროს მივიღე გადაწყვეტილება, რომ დამეტოვებინა ტერიტორია, რადგან ჩემთვის უკვე აღარ იყო უსაფრთხო იქ ყოფნა“ – წერს სულხან მესხიძე საგამოძიებო სამსახურისთვის მიმართულ განცხადებაში.
ამავე განცხადებაში იგი წერს მასზე თავდასხმის სხვა შემთხვევებზეც:
„ოცნების ქალაქში” კორპუსის სახურავის ჩამონგრევის შესახებ ინფორმაციას პირდაპირ ეთერში ვაწვდიდით საზოგადოებას, რა დროსაც ერთ-ერთი პირი გადაღების შეწყვეტასა და “აჭარა თაიმსის” ადგილიდან გაძევებას მოითხოვდა. თუმცა, ერთ-ერთი დაზარალებულის დახმარებით აგრესიულად განწყობილმა პირმა თავისი განზრახვა ვერ განახორციელა. ამ პერიოდში განსაკუთრებით, “ოცნების ქალაქში” მცხოვრები რამდენიმე პირი, რომლებიც ხელისუფლების მხარდამჭერები არიან, “აჭარა თაიმსის” მიმართ აგრესიული ქმედებებით გამოირჩეოდნენ. ისინი “ქართული ოცნების” წარმომადგენლებთან კრიტიკული კითხვების დასმას გვიკრძალავდნენ.
რაც შეეხება თავდასხმის მესამე ეპიზოდს, ეს მოხდა 2025 წლის 15 თებერვალს, რის დამადასტურებელი კადრები აგრეთვე გადაღებულია ჩემ მიერ. ამ ვიდეოში ჩანს, თუ როგორ ცდილობდა “ქართული ოცნება” ხალხის გაჩუმებასა და კრიტიკული განწყობების ჩახშობას. კერძოდ, „ოცნების ქალაქში“ აჭარის ეკონომიკის მინისტრი და ბათუმის საკრებულოს თავმჯდომარე რამდენიმე მხარდამჭერთან ერთად მივიდნენ, რის შემდეგაც მედიასა და მოქალაქეებზე თავდასხმა დაიწყო. აღსანიშნავია, რომ მმართველი გუნდის მხარდამჭერების მხრიდან გამოვლენილ აგრესიასა და ძალადობაზე ჯაბა ფუტკარაძეს, ასევე ირაკლი თავდგირიძეს რეაქცია არ ჰქონდათ.
აგრეთვე, ბათუმის მერიის თანამშრომელმა, გიორგი გიორგაძემ Facebook-ზე გამოაქვეყნა შემდეგი შინაარსის პოსტი: „უღირსი და უსაქციელო არაკაცი ხარ ფურთხსაც რომ ვერ გავიმეტებ შენთვის …“. პორტი არის ცალსახად მუქარის ტონისა და სიძულვილის ენის შემცველი“ – წერს სულხან მესხიძე.
იგი მიიჩნევს, რომ ეს ფაქტები ცალ-ცალკე და ერთობლიობაში ქმნიან სისხლის სამართლის კოდექსით გათვალისწინებული არაერთი მუხლის შემადგენლობას. კერძოდ: ჟურნალისტისთვის პროფესიულ საქმიანობაში უკანონოდ ხელის შეშლას (სსკ-ის 154-ე მუხლი) და სიცოცხლის მოსპობის ან ჯანმრთელობის დაზიანების ანდა ქონების განადგურების მუქარას.
„აღსანიშნავია, რომ 154-ე მუხლისათვის დამამძიმებელ გარემოებად ითვლება ზემოთ ხსენებული ქმედებები, ჩადენილი სამსახურებრივი მდგომარეობის გამოყენებით, რაც ბუნებრივია, მომეტებული საზოგადოებრივი საშიშროების შემცველია.
გთხოვთ, თქვენი კომპეტენციის ფარგლებში, დაუყოვნებლივ დაიწყოთ გამოძიება სისხლის სამართლის საპროცესო კოდექსის შესაბამისი მუხლების დარღვევაზე“ – მიმართავს სულხან მესხიძე საგამოძიებო სამსახურს.
სულხან მესხიძემ განცხადებით საგამოძიებო სამსახურს ახალგაზრდა იურისტთა ასოციაციის დახმარებით მიმართა.
