22 თებერვალს, შაბათს, ბათუმში მდუმარე მარში გაიმართება.
მარში 22 თებერვალს, 17:00 საათზე, ბათუმის ცენტრალური პარკის კოლონადებიდან [მემედ აბაშიძისა და პეტრე მელიქიშვილის ქუჩების კვეთაში] დაიწყება.
როგორც ფეისბუქზე დაანონსებულ ინფორმაციაშია აღნიშნული, მდუმარე მარში „ოცნების ქალაქში“ დაღუპულ ორ ბავშვის ხსოვნის პატივსაცემად იმართება.
„ოცნების ქალაქში“ ანდრიას და ლევანის დაღუპვიდან 4 დღე გავიდა.
რატომ არ გამოცხადდა გლოვა ქვეყანაში?
რატომ არ ჰქონდა ტერიტორიას უსაფრთხოების ღობე შემოვლებული?
რატომ არავინ გაითვალისწინა ხალხისგან მიტაცებულ აჭარის ფინანსთა და ეკონომიკის სამინისტროში, ბათუმის მერიაში, ხალხისგან მიტაცებულ აჭარისა და საქართველოს მთავრობებში, რომ მოსამზადებელი სამუშაოები არ უნდა დაწყებულიყო უსაფრთხოების სტანდარტების დაცვის გარეშე?
რის გაკეთებას აპირებენ დასახლებაში დანაშაულებრივი გულგრილობის გამო მომხდარი შემზარავი ფაქტის შემდეგ, რომ მსგავსი რამ არ განმეორდეს?
როდის ამოავსებენ ორმოებს, როდის დახურავენ ღია ჭებს, რომ მორიგი ტრაგედიის შიშით არ ვცხოვრობდეთ?
ანდრიას და ლევანის ხსოვნის პატივსაცემად, ჩვენი შვილების დასაცავად, კორუფციისა და სამსახურებრივი გულგრილობის გამო ტრაგედიიდან ტრაგედიამდე ცხოვრების აუტანლობის გამო!
გამოდით და შემოგვიერთდით მდუმარე მარშზე“ – ვკითხულობთ ანონსში.
15 თებერვალს ბათუმში, „ოცნების ქალაქში“, ორი ბავშვი – 4 და 6 წლის ბიჭები, წყლით სავსე თხრილში ჩავარდნის შემდეგ დაიღუპნენ.
ადგილი, სადაც ბავშვები დაიღუპნენ, მცირე მანძილით არის დაშორებული იმ ადგილიდან, სადაც 8 თებერვალს „ქართული ოცნების“ პრემიერ-მინისტრმა ირაკლი კობახიძემ „ოცნების ქალაქის“ მშენებლობის მეორე ეტაპის დაწყებასთან დაკავშირებით, სიმბოლური კაფსულა ჩააგდო. ამ ღონისძიებისთვის აჭარის ბიუჯეტიდან 209 ათასი ლარი დაიხარჯა.
„ქართული ოცნება“ ამბობს, რომ ადგილი, სადაც ბავშვები დაიღუპნენ, არ არის სამშენებლო ტერიტორია.
