მთავარი,სიახლეები

დაკავებული 19 წლის სტუდენტის, ზვიად ცეცხლაძის პასუხი პროპაგანდას – წერილი ციხიდან

22.01.2025 •
დაკავებული 19 წლის სტუდენტის, ზვიად ცეცხლაძის პასუხი პროპაგანდას – წერილი ციხიდან

აქციებზე დაკავებული, 19 წლის სტუდენტის, ზვიად ცეცხლაძის წერილს ახალგაზრდული მოძრაობა „დაფიონი“ ავრცელებს. ზვიად ცეცხლაძე ციხიდან ეხმიანება „ოცნების“ ერთ-ერთი ლიდერის, მამუკა მდინარაძის განცხადებას იმის შესახებ, რომ ის მზად არის, მსახიობ ანდრო ჭიჭინაძეს თავდებში ჩაუდგეს, ოღონდ იმ დათქმით,  „თუ ის გაითავისებს, რა ჩაიდინა, რაში იღებდა მონაწილეობას“.

„ვერ გაგვტეხეს და ამიტომ დაიწყეს დემაგოგიური კამპანია ჩვენი იმიჯის შესალახად. ვიხილეთ მდინარაძის გამოსვლა ანდროს წინააღმდეგ. სამწუხაროდ ანდროს პირადად არ ვიცნობ, მაგრამ კარგად ვიცნობ პროპაგანდას, რომელსაც მდინარაძე მიმართავს:

„თუ ასე გძულს რუსები, მაშინ მათ ფილმებში რატომ იღებ მონაწილეობას?“

აქ მდინარაძე ცდილობს ანდროს ფარისევლად და უპრინციპოდ წარმოჩენას. ამავდროულად, განზრახ მალავს იმ ეთნიკურად რუსი რეჟისორის პოლიტიკურ ფასეულობებს, რომელიც მისაზე ბევრად ანტიპუტინისტური და პროქართულია. მიზანმიმართულად აიგივებს ეთნიკურად რუსისა და რაშიზმის ცნებებს.

რაშიზმი ეწოდება იდეოლოგიას, რომლის მთავარი მიზანია ემსახუროს იმპერიალისტურ რუსეთს (როგორც მესამე რომს).

რაშისტი არის ადამიანი, რომელიც მიუხედავად თავისი ეროვნული წარმომავლობისა, ემსახურება რუსულ იმპერიალიზმს და ცდილობს მის დამკვიდრებას მთელს მსოფლიოში, განსაკუთრებით კი საკუთარ სამშობლოში.

ჩვენც სწორედ ამ რაშიზმსა და რაშისტებს ვებრძვით (რომლითაც სავსეა ქართული ოცნება). არამც და არამც ეთნიკური ნიშნით რუსებს! ჩვენში მიუღებელია ეთნიკური ზიზღი და შოვინიზმი!

და ბოლოს, ბატონო მდინარაძე, სანამ ერუდირებულ ადვოკატობაზე გექნებათ პრეტენზია, ჯერ უდანაშაულობის პრეზუმფცია შეიმეცნეთ, სანამ დამნაშავედ მოიხსენიებთ კაცს, რომელსაც ბრალი დამტკიცებული არ აქვს!“ – წერს ზვიად ცეცხლაძე ციხიდან.

მსახიობმა ანდრო ჭიჭინაძემ გუშინ, 20 იანვარს, უპასუხა ციხიდან მამუკა მდინარაძის შეთავაზებას თავდებობის შესახებ. ჭიჭინაძის წერილი მისმა ადვოკატმა, თორნიკე მიგინეიშვილმა გაავრცელა:

„მამუ, ძაან საყვარელი ხარ, მარა არ დაგავიწყდეს, რო უდანაშაულო ადამიანზე ლაპარაკობ“, – წერს ჭიჭინაძე.

ანდრო ჭიჭინაძეს და მასთან ერთად დაკავებულ პროევროპული აქციების კიდევ 10 მონაწილეს ბრალდება სისხლის სამართლის კოდექსის 225-ე მუხლის მეორე ნაწილით აქვთ წარდგენილი, რაც ჯგუფურ ძალადობაში, ამ შემთხვევაში, პოლიციელებზე თავდასხმაში მონაწილეობას გულისხმობს. ბრალის დამტკიცების შემთხვევაში მათ 4-დან 6 წლამდე პატიმრობა ემუქრება.

225-ე მუხლის პირველი ნაწილით აქვს წარდგენილი ბრალი 19 წლის სტუდენტს, ზვიად ცეცხლაძეს. ეს მუხლი მოიცავს: ჯგუფური მოქმედების ორგანიზება ან ხელმძღვანელობა, რასაც თან ახლავს ძალადობა, რბევა, სხვისი ნივთის დაზიანება ან განადგურება, იარაღის გამოყენება, იარაღის გამოყენებით ხელისუფლების წარმომადგენლისადმი წინააღმდეგობა ანდა მათზე თავდასხმა. ბრალის დამტკიცების შემთხვევაში ეს მუხლი 6-დან 9 წლამდე პატიმრობას ითვალისწინებს.

გადაბეჭდვის წესი


ასევე: