დღეს, 21 იანვარს, ბათუმის შოთა რუსთაველის უნივერსიტეტში რექტორის არჩევნები ხმაურის და პროტესტის ფონზე მიმდინარეობს.
„სირცხვილია“, „ცეცხლი ოლიგარქიას“ – ისმის უნივერსიტეტში, იქ, სადაც დახურულ კარს მიღმა უნივერსიტეტის აკადემიური საბჭო რექტორობის კანდიდატებს: „ოცნების“ დეპუტატს, ტიტე აროშიძეს და ბიოლოგიის დოქტორს, არჩილ გუჩმანიძეს უსმენს.
სტუდენტების ნაწილი აცხადებს, რომ „ოცნებას“ განზრახული აქვს რექტორად დანიშნოს „ოცნების“ არალეგიტიმური უმაღლესი საბჭოს წევრი ტიტე აროშიძე, პარტიული კადრი, რასაც ეწინააღმდეგებიან.
ამავე დროს უნივერსიტეტში შეიკრიბნენ სტუდენტური თვითმმართველობისა და „ოცნების“ მხარდამჭერი ახალგაზრდები, იყო სიტყვიერი დაპირისპირება.
ბსუ-ს ყოფილმა თანამშრომელმა, გოჩა სურგულაძემ, რომელმაც რუსული კანონის მიღების დროს, პროტესტის ნიშნად დატოვა უნივერსიტეტი, მოუწოდა ბსუ-ს ლექტორებს, ჩადგნენ სტუდენტებს შორის.
ტიტე აროშიძის მხარდამჭერი სტუდენტები
მასალა განახლდება.
ნახეთ „ბათუმელების“ პირდაპირი ჩართვა უნივერსიტეტიდან:
რექტორს აკადემიური საბჭო ირჩევს, რომლის წევრებიც არიან: პაატა აროშიძე – ასოცირებული პროფესორი, რექტორობის კანდიდატის, ტიტე აროშიძის ძმა; დალი მახარაძე – პროფესორი; ქეთევან ბერიძე – პროფესორი; ინგა დიასამიძე – ასოცირებული პროფესორი; ენვერ ხალვაში – პროფესორი; როსტომ ბერიძე – პროფესორი; მამია ფაღავა – პროფესორი; მერაბ არძენაძე – მთავარი მეცნიერ-თანამშრომელი; ელზა ფუტკარაძე – მთავარი მეცნიერ-თანამშრომელი და მარიამ მეტრეველი – მთავარი მეცნიერ-თანამშრომელი.
აკადემიური საბჭოს სწორედ ამ შემადგენლობამ უნდა გადაწყვიტოს, ვინ გახდება უნივერსიტეტის რექტორი ახლა, პოლიტიკური კრიზისის ფონზე, როცა ბსუ-ს არაერთი სტუდენტი პროევროპულ საპროტესტო აქციებზე დგას.
სტუდენტების ნაწილი მიიჩნევს, რომ ეს არის „ოცნების“ მიერ უნივერსიტეტის მიტაცების მცდელობა. განსაკუთრებით ღიად ამის შესახებ საუბრობენ ის სტუდენტები, რომლებიც აქტიურად მონაწილეობენ ბათუმში მიმდინარე საპროტესტო აქციებში.
ამავე თემაზე:
„უნდათ თავზე დაგვასვან ოცნების დეპუტატი“ – რას ამბობენ ბსუ-ში რექტორის არჩევნების წინ
