დღეს, 19 დეკემბერს, საღამოს, მეწყერი ჩამოწვა ხულოს სოფელ ჩაოში.
„მეწყერი ამ საღამოს ჩამოწვა. სოფელში ჩაიკეტა ცენტრალური გზები.
გადაუდებელი დახმარება რომ დასჭირდეს ვინმეს, სასწრაფო დახმარება ვერ მოვა. მე ახლა მეზობელთან ვარ. სახლში ვერ გავჩერდი. არ გაიჩერება, მეშინია. სხვა ოჯახებიც არიან, ვინც გამოვიდნენ სახლებიდან და მეზობლებთან ან ნათესავებთან აფარებენ თავს.
ოთხი ოჯახი ვართ, ვისაც პირდაპირ გვემუქრება საფრთხე.
სახლები დაბზარულია და ნელ-ნელა ყოველდღე იმატებს. მეწყრული მასა ჩემი სახლიდან დაახლოებით 10-15 მეტრშია, მეტი დაშორება არ არის”, – გვითხრა როინ შავაძემ, სოფელ ჩაოში მცხოვრებმა.
„მეც მეწყერსაშიშ ზონაში ვარ. ჩემი სახლი დახეთქილია, მაგრამ ყურადღების მომქცევი არავინაა. ახლა საფრთხის ქვეშ ვართ, მაგრამ რა ვქნათ? გინდა არ გინდა აქ ვარ. გასახლებაში არ ვართ”, – ამბობს „ბათუმელებთან“ ჩაოში მცხოვრები აბესალომ ცეცხლაძე. მისი თქმით, მათ დაახლოებით ერთი თვის წინ დაწერეს განცხადება, მაგრამ აქამდე არავინ გამოხმაურებია.
„ბათუმელები“ დაუკავშირდა ხულოს მერიისა და საგანგებო სიტუაციების მართვის პრესსამსახურებს ზოგადი მდგომარეობისა და დაგეგმილი ღონისძიებების შესახებ ინფორმაციისთვის, თუმცა უწყებებისგან პასუხი მასალის მომზადების პროცესში არ მიგვიღია.
ბოლო დღეებში, უხვი ნალექის პარალელურად, აჭარაში მეწყრული პროცესები გააქტიურდა. გუშინ, 18 დეკემბერს, მეწყერი განვითარდა ქედაში, დღეს, 19 დეკემბერს – შუახევსა და ხულოში.
___________
ფოტო „ბათუმელების“ 2023 წლის არქივიდან.
