შუახევში ბათუმი-ახალციხის საავტომობილო გზა ჩაიკეტა. შუახევის ცენტრთან ახლოს მეწყერი დღეს, 19 დეკემბერს, გამთენიისას ჩამოწვა.
„განვითარებულია მეწყერი. გორაა ჩამოსული და მიმდინარეობს სამუშაო პროცესი. იწმინდება, ტექნიკა მისულია. ალბათ, საღამოსკენ აღდგება მოძრაობა, მაგრამ ზუსტად ვერ გეტყვით, რადგან ძალიან დიდი მასაა ჩამოსული. ჩამოიტანა ხეებიც. ცენტრალურ გზაზეა საუბარი, როგორც კი შუახევის ცენტრს გაცდები.
მეწყერი დღეს, გამთენიისას ჩამოწვა. საავტომობილო მოძრაობა შეზღუდულია დილიდან. შემოვლითი გზა არის, მაგრამ მხოლოდ მაღალი გამავლობის ავტომობილებისთვის”, – გვითხრა მოქალაქე ბადრი გელაძემ, რომელიც ადგილზე იმყოფება.
შუახევის ცენტრალური გზა. 19/12/2024. ფოტო: ბადრი გელაძე
„შუახევში რამდენიმე დღეა გადაუღებლად წვიმს, რის შედეგადაც ბათუმი – ახალციხის შუახევის საავტომობილო გზის მონაკვეთზე ( სოფ. გორხანაული), განვითარდა მეწყრული პროცესი.
მიმდინარეობს სალიკვიდაციო სამუშაოები, რომელშიც საავტომობილო გზების დეპარტამენტის ტექნიკასთან ერთად, ჩართულია აჭარის საავტომობილო გზების დეპარტამენტის ტექნიკა.
გზის აღდგენითი სამუშაოები დღის ბოლომდე გაგრძელდება.
ამ ეტაპზე შესაძლებელია დაბაძველი- ოქროპილაურის მიმართულებით შემოვლითი გზით სარგებლობა”, – მოგვწერეს შუახევის მერიის პრესსამსახურიდან.
გუშინ, 18 დეკემბერს, მეწყერი განვითარდა ქედის ცენტრალურ საავტომობილო გზაზეც.
