დღეს, 19 დეკემბერს, ხულოში სოფლების ნაწილს არ მიეწოდება ელექტროენერგია. შუქი პრობლემურად მიეწოდება შუახევის რამდენიმე სოფელსაც.
„თუ იცით, თოვლის მოსვლას როგორ ვიგებთ? შუქი რომ ქრება, ვხვდებით, რომ მოსალოდნელია ცუდი ამინდი. ან უნდა გათოვდეს, ან იწვიმოს…
გზა არ არის გახსნილი, ჯერ გზა უნდა გაიხსნას, რომ ნახონ რა პრობლემის გამო არ მოგვეწოდება დენი. შიდა სასოფლო გზა არ არის გაწმენდილი, ცენტრალურ გზაზე რა ხდება, არც კი ვიცით. 5-6 დღეა, რაც შიდა სასოფლო გზა ჩაკეტილია.
ხომ გაგიგიათ, გზა არ არის, შუქი არ არის, მომკითხავი კაცი არ არის.
დღესაც არ იქნება შუქიო, ასე გვითხრეს. მოდიოდა და მალევე ქრებოდა. გუშინ ჩაქრა და მას შემდეგ აღარ მოსულა. ბოლოს რომ შუქი მთელი დღის განმავლობაში მოგვეწოდებოდა ალბათ ზაფხულში იყო”, – გვეუბნება რაინდი შავაძე ხულოს სოფელ დიდაჭარადან. მისი ინფორმაციით, უშუქოდ არიან დიდაჭარას მეზობელ სოფელში მცხოვრებლებიც.
ხულოს კიდევ ერთ სოფელში, ბეღლეთში გვითხრეს, რომ შუქი რამდენიმე დღეა, რაც არ მიეწოდებათ. იგივე მდგომარეობაა ბეღლეთის მეზობელ სოფლებში. ადგილობრივების თქმით, ინფორმაცია ელექტროენერგიის აღდგენით სამუშაოებზე არ აქვთ.
შუახევში, ჭვანას ხეობაში, “ბათუმელებს” უთხრეს, რომ ელექტროენერგია ფაქტობრივად არ მიეწოდებათ, რადგან დენი გამუდმებით ქრება.
ელექტროენერგიას აჭარის მუნიციპალიტეტებს კომპანია „ენერგო-პრო ჯორჯია“ აწვდის. „ბათუმელები“ კომპანიას დაუკავშირდა კითხვით, რამდენი სოფელია დარჩენილი დენის გარეშე ამჟამად მაღალმთიან აჭარაში.
„ხულოში ავარიულად არის გათიშული დიდაჭარას მიმართულება. აღდგენითი სამუშაოები გაართულა რთულმა მეტეოროლოგიურმა პირობებმა, მიუხედავად ამისა, სამუშაოები არ გაჩერებულა, ამ ეტაპზეც აქტიურად მუშაობს კომპანიის ტექნიკური სამსახურები, რათა დღის ბოლომდე მოხდეს დარჩენილი ნაწილისათვის ელექტროენერგიის მიწოდება.
შუახევშიც თითქმის სრულად არის ჩართული, მცირე შეზღუდვებია ჭვანის ხეობისკენ დღვანის მიმართულებით. ჯამში არ იქნება 300 აბონენტამდე, დღის ბოლომდე სავარაუდოდ შუახევის შეზღუდვებსაც გავანულებთ.
ქედის მუნიციპალიტეტში ყველა აბონენტი ჩართულია”, – მოგვწერეს „ენერგო-პრო ჯორჯიას“ პრესსამსახურიდან.
