დღეს, 3 დეკემბერს, თბილისში, ჩხრეკა მიმდინარეობს ბლოგერის, ციფრული მარკეტინგის სპეციალისტისა და აქტივისტის, დოდი ხარხელის ბინაში.
ბინასთან ამ წუთებში [13:30] პოლიციაა მობილიზებული.
ინფორმაცია იმის შესახებ, რომ დოდი ხარხელის სახლთან პოლიცია იყო, თავდაპირველად მისმა ქმარმა გაავრცელა, მოკლე ხანში კი გავრცელდა კადრები, სადაც ჩანს, რომ აქტივისტი დაახლოებით ათმა პოლიციელმა შეაჩერა საბავშვო ბაღთან, მას შემდეგ, რაც მან შვილი ბაღში დატოვა.
ვიდეოში ისმის, რომ დოდი სთხოვს იქ მცხოვრებლებს, ჩართონ ლაივი და ასევე მისი სიტყვები – „რუსული ოცნება, რუსული ტერორი! მარტო იმიტომ, რომ აქციებზე ვდგავარ!“
მოგვიანებით ხარხელი პოლიციამ სახლში მოიყვანა. მის საცხოვრებელ კორპუსთან შეიკრიბნენ მისი მეგობრები და ჟურნალისტები. შსს არ ამბობს, რა საგამოძიებო მოქმედება მიმდინარეობს აქტივისტის სახლში და მისი დაკავების შესახებ ინფორმაციას არც უარყოფს და არც ადასტურებს.
_____________
ფოტოზე: დოდი ხარხელის დაკავების კადრები
ნახეთ „ნეტგაზეთის“ პირდაპირი ჩართვა დოდი ხარხელის სახლიდან:
