საქართველოს სხვადასხვა რეგიონის სკოლებში მოსწავლეთა პროტესტს ეხმიანება ორგანიზაცია „პარტნიორობა ადამიანის უფლებებისთვის – PHR“. ორგანიზაცია ხაზს უსვამს, რომ ბავშვებს მშვიდობიანი შეკრებისა და საპროტესტო აქციებში მონაწილეობის უფლება აქვთ.
„საქართველოს ბავშვის უფლებათა კოდექსის მე-17 მუხლი ანიჭებს ყველა ბავშვს უფლებას ისარგებლონ გაერთიანებისა და მშვიდობიანი შეკრების თავისუფლებებით.
აგრეთვე, ბავშვის უფლებათა კონვენციის მე-15 მუხლი ავალდებულებს სახელმწიფოს აღიაროს და დაიცვას ყველა ბავშვის მშვიდობიანი შეკრების თავისუფლება. სახელმწიფო ვალდებულია ხელი შეუწყოს ბავშვებს, დაუბრკოლებლად ისარგებლონ მინიჭებული უფლებებით.
მოვუწოდებთ ყველას, თავი შეიკავონ ბავშვის უფლებათა ეროვნული კანონმდებლობით და საერთაშორისო ხელშეკრულებით მინიჭებული უფლებით სარგებლობის დროს უკანონო ჩარევისგან“ – აცხადებს ორგანიზაცია.
ამავე დროს „პარტნიორობა ადამიანის უფლებებისთვის“ მზადყოფნას გამოთქვამს, გაუწიოს ბავშვებს სამართლებრივი დახმარება მათი უფლებების დარღვევის ნებისმიერ ფაქტზე. ორგანიზაციას შეგიძლიათ დაუკავშირდეთ ნომრებზე: 591551220; 598668806.
______________
ფოტოზე: ბათუმის ერთ-ერთი საჯარო სკოლის მოსწავლეების გზავნილი დაფაზე.
