დღეს, 25 ნოემბერს, პრეზიდენტმა სალომე ზურაბიშვილმა საზოგადოებას მიმართა და განაცხადა, რომ საჭიროა, ახალი თაობა, ახალი პოლიტიკური ძალები გამოჩნდნენ საქართველოში.
„მივესალმები საქართველოს საზოგადოებას, რომელსაც დღეს გული სტკივა. და უნდა ყველას გვტკიოდეს გული, რადგან დღეს საქართველოს პარლამენტი აღარ არსებობს და საქართველოს პარლამენტმა თუ მმართველმა გუნდმა, ერთმა პარტიამ დაიხია თავზე თავზე კონსტიტუცია.
ძალიან მეცოდებიან.
მეცოდება პირველ რიგში კობახიძე, როგორც ამ კონსტიტუციის დამწერი, როგორც ჩანს რაღაცები ვერ გათვალა, თორემ არ დასჭირდებოდა, რომ თავზე დაეხია კონსტიტუცია. მეცოდებიან ყველა ის პარლამენტარები, რომლებიც დღეს ისხდნენ გაყინული სახეებით, რამეთუ მათ იციან, რომ არიან გაყალბებული არჩევნების შედეგი. რამეთუ იციან, რომ იქნებიან რამოდენიმე თვით, თუ რამოდენიმე კვირით, არ ვიცი, ჩაკეტილი ამ დარბაზში, სადაც მათ თვითონ, არც ერთს, არანაირი უფლება არ გააჩნიათ.
მეცოდება ის საქართველო, სადაც ადამიანები ერთმანეთს ისე ესალმებიან, როგორც ჩვენ დღეს ვნახეთ კადრები, რომელიც ნამდვილად სამარცხვინოა და შევა ისტორიაში როგორც სამარცხვინო კადრი, ერთიმეორის მისალმების თუ დაჩოქების.
სამაგიეროდ არ მეცოდებით თქვენ, არ მეცოდება ჩვენი საზოგადოება, რომელიც დგას იქ, სადაც უნდა იდგეს და როცა უნდა იდგეს.
არ მეცოდება ჩვენი ახალგაზრდობა, რამეთუ მომავალი მათ ხელში არის და უნდა მოემზადონ იმისთვის, რომ არამხოლოდ მომავალი იყოს მათი, არამედ ძალიან მალე, ძალიან სწრაფად, ხელში აიღონ სადავეები ამ ქვეყნის.
თუ რამეს ვხედავთ ჩვენ, ეს არის, რომ თქვენი დრო მოვიდა. ის ძველი დრო, რომელიც ასახულია დღევანდელ პარლამენტში, ის ძველი დრო ნამდვილად დამთავრდა და საჭიროა, რომ ახალი თაობა, ახალი პოლიტიკური ძალები გამოჩნდნენ ამ ქვეყანაში, იმიტომ, რომ ძალიან მალე დადგება დრო ახალი არჩევნების, რომელიც უნდა ჩატარდეს ახალი ფორმით, არა კალანდარიშვილისეული ფორმით, არამედ თავისუფლად, სამართლიანად და ეს დრო ნამდვილად მოდის.
ჩვენი მთავარი მოვალეობა დღეს ის კი არ არის, რომ ყოველ დღე მაინცდამაინც ვიდგეთ სადმე, მთავარი მოვალეობა არის მომზადება და თუ მოვემზადებით, იმედი უნდა გვქონდეს ჩვენი თავის, ჩვენი პარტნიორების, რომლებიც ნამდვილად მზად არ არიან, რომ მიატოვონ საქართველო და იმის, რომ მომავალი არის ამ ქვეყნის და ჩვენი, ყველასი ერთად.
და მე, როცა გადავწყვეტ წავიდე სტრასბურგში, როგორც აქამდე ყოველჯერ, გეტყვით წინასწარ, გეტყვით რისთვის მივდივარ, გეტყვით ვის ვხვდები, რას ვაკეთებ და როგორ დავბრუნდები.
მე აქ ვიქნები და ერთად მოვემზადებით შემდეგი არჩევნებისთვის“ – განაცხადა პრეზიდენტმა. დღეს, 25 ნოემბერს, „ქართულმა ოცნებამ“ პარლამენტის 150 წევრის უფლებამოსილება ცნო.
კონსტიტუციონალისტების განმარტებით, ეს პროცედურაც და გადაწყვეტილებაც არაკონსტიტუციურია. შესაბამისად, არაკონსტიტუციურია პარლამენტიც.
დღევანდელ დღეს პრეზიდენტმა ზურაბიშვილმა „შავი ორშაბათი“ უწოდა.
