„ერთიანი ნაციონალური მოძრაობა“ აჭარაში აცხადებს, რომ 16 ოქტომბერს, ღამით, ხელვაჩაურში მათი პარტიის ხელვაჩაურის შტაბის წევრებს ავტომობილი, რომელშიც სააგიტაციო მასალა იდო, უმიზეზოდ ჩამოართვეს და დალუქვის გარეშე საჯარიმოზე გადაიყვანეს.
ამ თემაზე დღეს ბრიფინგი გაიმართა ენმ-ის ბათუმის ოფისში.
„გუშინ, როცა ჩვენი ხელვაჩაურის შტაბის წევრები იყვნენ გასული სააგიტაციო მასალის გასაკრავად და დასარიგებლად, ადგილზე მისულებს მათ დახვდათ შსს-ს სხვადასხვა ქვედანაყოფები, ყოველგვარი მიზეზი ახსნის გარეშე მათ მოახდინეს ჩვენი ავტომობილის უკანონო დაპატიმრება, მათ დალუქვის გარეშე მანქანა გადაიყვანეს შშს-ს ავტოსადგომზე.
ეს არის ნათელი მაგალითი იმისა, რომ „ქართული ოცნება“ ამ ქვეყანაში აპირებს ქართველ ხალხს მოჰპაროს გამარჯვება.
მოვუწოდებთ საქართველოში აკრედიტებულ სხვადასხვა დიპლომატიურ წარმომადგენლებს და საერთაშორისო ორგანიზაციებს, რომ უმალვე მოახდინონ რეაგირება ამ ფაქტზე“ – განაცხადა ბრიფინგზე ნიკა ქაშიბაძემ, ენმ-ის წევრმა.
ბრიფინგი „ერთიანი ნაციონალური მოძრაობის“ ბათუმის ოფისში
მან დასძინა, რომ „ოცნება“ ყველაფერს აკეთებს იმისთვის, რომ ხელი შეუშალოს ერთიანი ნაციონალური მოძრაობის კამპანიას“.
„ბათუმელები“ კომენტარისთვის შს სამინისტროს დაუკავშირდა, კითხვით, რატომ იქნა გადაყვანილი „ნაციონალური მოძრაობის“ მანქანა საჯარიმოზე. პასუხის მიღების შემთხვევაში მასალა განახლდება.
_____________
ფოტოზე: მანქანის გადაყვანის კადრები ენმ-ის ვიდეომასალიდან
